ٹام کروز کی فلم ڈیگر باکس آفس پر ناکام، اداکار صدمے میں

ہالی ووڈ کے مایہ ناز اداکار ٹام کروز اپنی تازہ ترین فلم 'ڈیگر' کی باکس آفس پر انتہائی کمزور کارکردگی اور متوقع بھاری مالی نقصان پر مکمل طور پر دنگ رہ گئے ہیں۔ فلمی دنیا سے وابستہ قریبی ذرائع کا کہنا ہے کہ ٹام کروز اس بات پر پختہ یقین رکھتے تھے کہ ناظرین اس پراجیکٹ کو ہاتھوں ہاتھ لیں گے اور سنیما گھروں میں اسے زبردست پذیرائی ملے گی، تاہم حقیقت اس کے بالکل برعکس ثابت ہوئی۔ رپورٹس کے مطابق اس فلم کو باکس آفس پر کروڑوں ڈالر کا نقصان اٹھانا پڑ سکتا ہے جس نے سب کو حیران کر دیا ہے۔ فلم ریلیز ہونے سے کچھ ہی عرصہ قبل ٹام کروز کا یہ مؤقف بھی سامنے آیا تھا کہ وہ محض اوپننگ ویک اینڈ کے لیے فلمیں نہیں بناتے بلکہ ان کی کوشش ہوتی ہے کہ ایسی لازوال فلمیں تخلیق کی جائیں جو طویل عرصے تک یاد رکھی جائیں۔ لیکن بدقسمتی سے 'ڈیگر' کو رواں سال کی سب سے زیادہ متنازعہ اور باکس آفس پر کمزور کارکردگی دکھانے والی فلموں میں شمار کیا جا رہا ہے۔ اس صورتحال نے جہاں فلم کے پروڈیوسرز اور سرمایہ کاروں کو تشویش میں مبتلا کر رکھا ہے، وہیں خود ٹام کروز کے لیے بھی یہ نتائج کسی بڑے دھ جھٹکے سے کم نہیں ہیں۔ فلمی تجزیہ کاروں کا کہنا ہے کہ اس ناکامی کے بعد اب ہالی ووڈ میں بڑے بجٹ کی فلموں کے حوالے سے نئی حکمت عملی بنائی جا سکتی ہے کیونکہ شائقین کا رجحان اب تیزی سے تبدیل ہو رہا ہے۔