راولپنڈی میں ایک ماہ کے لیے دفعہ 144 نافذ، تمام اجتماعات پر پابندی

راولپنڈی میں ضلعی انتظامیہ نے سکیورٹی خدشات اور امن و امان کی صورتحال کو برقرار رکھنے کے لیے ضلع بھر میں ایک ماہ کے لیے دفعہ 144 نافذ کرنے کا اعلان کر دیا ہے۔ یہ فیصلہ حساس تنصیبات، اہم شاہراہوں اور دیگر اہم ڈھانچوں کو لاحق ممکنہ خطرات کے پیش نظر کیا گیا ہے۔ ضلعی انٹیلی جنس کمیٹی کے اجلاس میں ملنے والی اطلاعات کے مطابق کچھ عناصر ضلع میں امن و امان خراب کرنے کی کوشش کر رہے ہیں، جس سے انسانی جانوں اور عوامی املاک کو شدید خطرہ لاحق ہو سکتا ہے۔ اس صورتحال کے تناظر میں ڈپٹی کمشنر راولپنڈی ریٹائرڈ کیپٹن ندیم ناصر کی جانب سے جاری کردہ نوٹیفیکیشن کے مطابق یہ پابندی 8 نومبر تک نافذ العمل رہے گی۔ نافذ کردہ دفعہ 144 کے تحت ضلع بھر میں پانچ یا اس سے زائد افراد کے عوامی اجتماعات، جلوسوں، جلسوں اور دھرنوں پر مکمل پابندی عائد کر دی گئی ہے۔ اس کے علاوہ قانون نافذ کرنے والے اداروں کے علاوہ کسی بھی شخص کو اسلحہ، پٹرول بم، غلیلیں، بیئرنگ، یا اس قسم کے دیگر ہلاکت خیز آلات ساتھ رکھنے اور ان کی نمائش کی اجازت نہیں ہوگی۔ ضلعی انتظامیہ کی جانب سے یہ بھی واضح کیا گیا ہے کہ اس دوران ڈرون کیمروں کے استعمال پر بھی پابندی ہوگی اور پولیس کی جانب سے ٹریفک یا اجتماعات کو ریگولیٹ کرنے کے لیے لگائی گئی پابندیوں کو توڑنے والوں کے خلاف سخت قانونی کارروائی عمل میں لائی جائے گی۔ یاد رہے کہ حالیہ دنوں میں سیاسی جماعتوں کی جانب سے اسلام آباد کی طرف مارچ کے اعلانات اور کے پی کے وزیر اعلیٰ کے بیانات کے بعد ملک کے مختلف حصوں میں سکیورٹی انتہائی سخت کر دی گئی ہے۔ راولپنڈی سے پہلے جڑواں شہر اسلام آباد اور صوبہ پنجاب کے دارالحکومت لاہور سمیت دیگر اہم شہروں میں بھی امن و امان کی فضا کو برقرار رکھنے اور ممکنہ ہنگامہ آرائی کو روکنے کے لیے اسی نوعیت کے اقدامات اٹھائے جا چکے ہیں، جن کا بنیادی مقصد عام شہریوں کی زندگی اور املاک کا تحفظ یقینی بنانا ہے۔