یونان میں آگ بجھانے والے ہیلی کاپٹروں کا فضا میں تصادم

یونان میں ریکارڈ توڑ گرمی کی لہر اور جنگلات میں لگنے والی ہولناک آگ پر قابو پانے کی کوششوں کے دوران ایک بڑا فضائی حادثہ پیش آ گیا ہے۔ اطلاعات کے مطابق آگ بجھانے کے فرائض سر انجام دینے والے دو ہیلی کاپٹر فضا میں ایک دوسرے سے ٹکرا گئے جس کے نتیجے میں دونوں طیارے تباہ ہو گئے ہیں۔ اس حادثے کے بعد طیاروں پر سوار کم از کم چار عملہ ارکان لاپتہ بتائے جا رہے ہیں جن کی تلاش کے لیے ہنگامی بنیادوں پر امدادی کارروائیاں شروع کر دی گئی ہیں۔ مقامی حکام اور ریسکیو اداروں کی ٹیمیں جائے وقوعہ پر موجود ہیں اور ملبے سے لاپتہ افراد کو تلاش کرنے کی ہر ممکن کوشش کی جا رہی ہے۔یورپی ممالک ان دنوں شدید اور ریکارڈ توڑ گرمی کی لپیٹ میں ہیں، جس کی وجہ سے یونان کے علاوہ فرانس اور اسپین کے جنگلات میں بھی تباہ کن آگ بھڑک اٹھی ہے۔ جنگلات کی اس پھیلتی ہوئی آگ نے رہائشی علاقوں کو بھی اپنی لپیٹ میں لے لیا ہے، جس کے بعد ہزاروں افراد کو محفوظ مقامات پر منتقل کرنے کے لیے بڑے پیمانے پر انخلا کی کارروائیاں کی جا رہی ہیں۔ فضائی فائر فائٹنگ یونٹس اس بحران سے نمٹنے کے لیے دن رات مصروف عمل ہیں تاکہ آگ کے پھیلاؤ کو روکا جا سکے اور قیمتی انسانی جانوں اور املاک کا تحفظ یقینی بنایا جا سکے۔حکا م نے اس حادثے کو یونان کے لیے ایک بڑا المیہ قرار دیا ہے جبکہ لاپتہ عملہ ارکان کے اہل خانہ اور پوری قوم میں شدید تشویش پائی جا رہی ہے۔ ریسکیو آپریشن میں جدید آلات اور اضافی ٹیموں کو بھی طلب کر لیا گیا ہے تاکہ جلد از جلد صورتحال پر قابو پایا جا سکے اور لاپتہ افراد کے بارے میں مصدقہ معلومات حاصل کی جا سکیں۔ یورپی یونین کے دیگر ممالک نے بھی اس مشکل وقت میں یونان کے ساتھ یکجہتی کا اظہار کرتے ہوئے ہر ممکن تعاون کی پیشکش کی ہے۔