کراچی میں دفعہ 144 کا نفاذ، پانچ افراد سے زائد کے اجتماع پر پابندی

کراچی کے کمشنر نے شہر بھر میں امن و امان کی صورتحال کو برقرار رکھنے، ٹریفک کی روانی کو یقینی بنانے اور شہریوں کو کسی بھی قسم کی دشواری سے بچانے کے لیے دفعہ 144 نافذ کردی ہے۔ یہ پابندی فوری طور پر نافذ العمل ہوگی اور 20 اکتوبر تک برقرار رہے گی۔ اس حکم نامے کے تحت شہر میں پانچ یا اس سے زائد افراد کے کسی بھی قسم کے اجتماع، جلوس، دھرنے اور احتجاج پر مکمل پابندی عائد کر دی گئی ہے۔ ضابطہ فوجداری (سی آر پی سی) کی دفعہ 144 کے تحت جاری ہونے والے اس نوٹیفکیشن میں کہا گیا ہے کہ حالیہ دنوں میں اہم شاہراہوں اور چورنگیوں پر مظاہروں اور دھرنوں کی وجہ سے ٹریفک کا نظام شدید متاثر ہوا ہے اور عام شہریوں کو آمدورفت میں مشکلات کا سامنا کرنا پڑا ہے۔ نوٹیفکیشن کے مطابق شہر کے مختلف حصوں میں ہونے والے ان مظاہروں اور دھرنوں سے نہ صرف روزمرہ کی زندگی مفلوج ہوئی بلکہ ہنگامی خدمات اور اسپتالوں تک مریضوں کی رسائی بھی بری طرح متاثر ہوئی۔ انتظامیہ کا کہنا ہے کہ سڑکوں کی بندش سے سکیورٹی کے سنگین خدشات بھی پیدا ہو رہے تھے، جس کے پیش نظر فوری طور پر حفاظتی اقدامات اٹھانا ناگزیر ہو گیا تھا۔ حکام کا ماننا ہے کہ اس پابندی سے شہر میں امن و امان کی فضا کو برقرار رکھنے اور عوام کی جان و مال کے تحفظ کو یقینی بنانے میں مدد ملے گی۔ کمشنر کراچی سید حسن نقوی کی جانب سے جاری کردہ حکم نامے میں اس بات پر زور دیا گیا ہے کہ عوامی مقامات پر ہتھیاروں کی نمائش اور غیر قانونی اجتماعات کسی بھی صورت برداشت نہیں کیے جائیں گے۔ انتظامیہ کو ہدایت کی گئی ہے کہ وہ اس حکم پر سختی سے عمل درآمد کرائیں تاکہ کسی بھی نا خوشگوار واقعے سے بچا جا سکے۔ اس فیصلے کا بنیادی مقصد شہریوں کی روزمرہ سرگرمیوں، تجارتی امور اور ضروری خدمات کی بلاتعطل فراہمی کو ممکن بنانا ہے تاکہ کراچی کے عوام پُرسکون ماحول میں اپنی زندگی گزار سکیں۔