مدھوبالا کی صحت: سری لنکن ماہرِ حیوانات کی اچانک وطن واپسی

کراچی کے سفاری پارک میں زیر علاج بیمار ہاتھی مدھوبالا کی صحت کے حوالے سے بحران مزید سنگین ہوتا جا رہا ہے کیونکہ سری لنکن وائلڈ لائف ہیلتھ اسپیشلسٹ ڈاکٹر بدھیکا بندرا، جو جمعہ کے روز مدھوبالا کو بچانے کی کوششوں میں شامل ہونے آئے تھے، اسی دن نامعلوم حالات میں واپس روانہ ہو گئے۔ اس اچانک روانگی نے سفاری پارک کے انتظامی امور اور ہاتھی کی بگڑتی ہوئی صحت پر گہرے سوالات اٹھا دیے ہیں۔ ذرائع کے مطابق مقامی حکام نے مہمان سری لنکن ماہر کو اس بات سے آگاہ نہیں کیا تھا کہ انہیں سفاری پارک میں عالمی فلاحی ادارے 'فور پاز' کے ڈاکٹر عامر خلیل کے ساتھ کام کرنا ہوگا۔ اس صورتحال کی وجہ سے دونوں فریقین کے درمیان اعتماد کو نقصان پہنچا جس نے ماہر کو خاموشی سے واپس جانے پر مجبور کیا۔ ذرائع نے یہ بھی بتایا کہ مدھوبالا کی تشویشناک حالت نے بھی انہیں دنگ کر دیا ہوگا جبکہ ڈاکٹر بندرا نے پریس کانفرنس کے دوران میڈیا سے بات کرنے سے گریز کیا جس سے صحافی بھی حیران ہوئے۔ دوسری جانب کراچی میٹروپولیٹن کارپوریشن (کے ایم سی) کے ترجمان دانیال سیال نے ان تمام خدشات کو مسترد کرتے ہوئے موقف اختیار کیا کہ ڈاکٹر بدھیکا بندرا اپنے کسی عزیز کی کولمبو میں ناگہانی موت کی وجہ سے فوری طور پر روانہ ہوئے۔ ترجمان کا کہنا تھا کہ وہ پچھلے ایک سال سے مدھوبالا کے ٹی بی کے علاج کی آن لائن مانیٹرنگ کر رہے تھے اور ان کا موجودہ قیام ایک ہفتے کا طے تھا۔ مدھوبالا حالیہ مہینو ں میں شدید وزن میں کمی اور کمزوری کا شکار ہے اور وہ اپنے باڑے میں دو بار گر بھی چکی ہے۔ ماہرین کے مطابق ہاتھی کو متعدد بیکٹیریل اور پیراتیسٹک انفیکشنز لاحق ہیں جبکہ ٹی بی کے علاج کے بعد پیدا ہونے والی کمزوری نے اس کی حالت کو انتہائی نازک بنا دیا ہے۔ مقامی سطح پر ناکامی کے بعد اب عالمی ماہرین کی خدمات حاصل کی جا رہی ہیں تاکہ اس بے زبان جانور کی جان بچائی جا سکے۔