فتاح ٹو ہائپرسونک میزائل کا کامیاب تجربہ - پاک فوج

راولپنڈی: پاک فوج نے فتاح ٹو ایکسٹینڈڈ رینج (ای آر) ہائپرسونک میزائل کا کامیاب تجربہ کیا ہے۔ پاک فوج کے شعبہ تعلقات عامہ (آئی ایس پی آر) کے جاری کردہ بیان کے مطابق منگل کے روز کیے جانے والے اس تجربے میں میزائل کی تمام تکنیکی صلاحیتوں کا کامیابی سے اعادہ کیا گیا۔ فتاح ٹو ای آر جدید ترین نیویگیشن سسٹمز اور اسٹیٹ آف دی آرٹ ایویونکس سے لیس ہے، جو اسے روایتی میزائلوں سے ممتاز بناتا ہے۔ آئی ایس پی آر کا کہنا ہے کہ یہ میزائل نہ صرف انتہائی درستگی کے ساتھ اپنے ہدف کو نشانہ بنانے کی صلاحیت رکھتا ہے بلکہ اپنی منفرد پراجیکٹری اور شاندار مینوور ایبلٹی فیچرز کی بدولت دشمن کے جدید ترین میزائل ڈیفنس سسٹمز کو بھی باآسانی شکست دے سکتا ہے۔ اس کامیاب تجربے کے بعد پاک فوج کی دور مار کرنے کی صلاحیت اور دشمن کے اندرونی حصوں تک رسائی میں نمایاں اضافہ ہو گیا ہے۔ میزائل کے اس تجربے کا مشاہدہ آرمی راکٹ فورس کمانڈ (اے آر ایف سی) کے سربراہ لیفٹیننٹ جنرل نعمان زکریا، اعلیٰ عسکری حکام، ممتاز سائنسدانوں اور نامور انجینئرز نے کیا۔ اس موقع پر اے آر ایف سی کمانڈر نے اس جدید ترین ہتھیار کی تیاری میں حصہ لینے والے سائنسدانوں اور انجینئرز کی انتھک محنت، لگن اور تکنیکی مہارت کو سراہا۔ انہوں نے اس بات پر زور دیا کہ ملکی دفاع کو ناقابل تسخیر بنانے کے لیے جدید ٹیکنالوجی کا حصول ناگزیر ہے۔ دریں اثنا، صدر مملکت، وزیراعظم اور چیئرمین جوائنٹ چیفس آف سٹاف کمیٹی نے بھی سائنسدانوں اور انجینئرز کو فتاح ٹو کے اس توسیع شدہ رینج والے ورژن کی کامیابی پر مبارکباد پیش کی۔ دوسری جانب وزیر داخلہ محسن نقوی نے بھی قوم کو اس اہم دفاعی کامیابی پر مبارکباد دی اور اسے ملکی دفاعی شعبے میں ایک سنگ میل قرار دیا۔ واضح رہے کہ اس سے قبل گزشتہ ہفتے بھی دیسی ساختہ فتاح فور کروز میزائل کا کامیاب تجربہ کیا گیا تھا، جس سے پاکستان کے دفاعی پروگرام کی مسلسل کامیابی اور عسکری خود کفالت کا عزم ظاہر ہوتا ہے۔