پیمرا کی ٹی وی چینلز کو دہشت گردانہ حملوں کی لائیو کوریج سے روکنے کی ہدایت

اسلام آباد: پاکستان الیکٹرانک میڈیا ریگولیٹری اتھارٹی (پیمرا) نے ملک بھر کے تمام سیٹلائٹ ٹی وی چینلز کو ہدایت کی ہے کہ وہ کسی بھی ناخوشگوار یا غیر معمولی واقعے، بشمول دھماکوں، فائرنگ اور دہشت گردانہ حملوں کی نشریات، دوبارہ نشریات اور لائیو کوریج سے مکمل گریز کریں۔ پیمرا کی طرف سے جاری کردہ حکم نامے میں کہا گیا ہے کہ ٹی وی چینلز کو صرف وہی معلومات نشر کرنی چاہئیں جن کی تصدیق متعلقہ محکموں یا قانون نافذ کرنے والے اداروں کی طرف سے کی گئی ہو۔ میڈیا ریگولیٹر نے چینلز کو یہ بھی ہدایت کی ہے کہ وہ نشریات میں تاخیر کے میکزم یعنی ٹائم ڈیلے میکزم کا مؤثر استعمال یقینی بنائیں اور سپریم کورٹ کے 2018 کے از خود نوٹس فیصلے اور اسلام آباد ہائی کورٹ کے 2022 کے حکم کے مطابق ایک آزاد ادارتی بورڈ تشکیل دیں۔ پیمرا نے واضح کیا ہے کہ اگر کسی بھی ادارے کی جانب سے ان احکامات کی خلاف ورزی کی گئی تو پیمرا آرڈیننس 2002 کی دفعات 29-اے، 30 اور 33 کے تحت سخت قانونی کارروائی عمل میں لائی جائے گی۔ یہ پیشرفت ایسے وقت میں سامنے آئی ہے جب وفاقی حکومت نے صوبہ خیبر پختونخوا میں ہنگامی حالت اور گورنر راج نافذ کرنے کا فیصلہ کیا، جس کی وجہ صوبائی حکومت کی دہشت گردی کے خلاف جنگ سے مبینہ چشم پوشی بتائی گئی۔ اس سیاسی کشیدگی اور طویل احتجاجی مظاہروں کے پس منظر میں میڈیا کی نشریات کو ضابطے میں لانے کے لیے یہ سخت ہدایات جاری کی گئی ہیں تاکہ سکیورٹی اور امن عامہ کی صورتحال کو بہتر طریقے سے سنبھالا جا سکے۔