روس اور پاکستان کے درمیان معاشی اور دفاعی تعاون بڑھانے پر اتفاق

اسلام آباد میں روسی وزیر داخلہ ولادیمیر کولوکولٹسیف کے دورے کے دوران پاکستان اور روس کے مابین دوطرفہ تعلقات کو نئی بلندیوں تک لے جانے کے لیے اہم امور پر تبادلہ خیال کیا گیا۔ روسی وزیر داخلہ نے وزیراعظم شہباز شریف سے ملاقات کی جس میں تجارت، معاشی ترقی، توانائی اور سرمایہ کاری کے شعبوں میں باہمی تعاون کو مزید گہرا کرنے پر زور دیا گیا۔ وزیراعظم آفس کے مطابق دونوں رہنماؤں نے دوطرفہ تعلقات میں مثبت پیش رفت پر اطمینان کا اظہار کیا اور اس عزم کا اعادہ کیا کہ باہمی فائدے کے لیے موجودہ میکزم کا موثر استعمال کیا جائے گا۔ روسی وزیر داخلہ نے کثیرالجہتی فورمز بالخصوص اقوام متحدہ میں پاکستان کی حمایت کو بھی سراہا۔ اس دورے کے دوران روسی وزیر داخلہ نے جنرل ہیڈ کوارٹر راولپنڈی کا دورہ کیا جہاں انہوں نے آرمی چیف سے ملاقات کی۔ اس ملاقات میں علاقائی سیکیورٹی کی صورتحال اور باہمی دلچسپی کے امور پر تفصیلی گفتگو کی گئی جبکہ دونوں ممالک کے سیکیورٹی اداروں کے درمیان قریبی روابط اور بہتر رابطہ کاری کو فروغ دینے کی ضرورت پر زور دیا گیا۔ فریقین نے انسداد دہشت گردی اور سیکیورٹی کے شعبے میں عملی تعاون کو وسعت دینے کے عزم کا اعادہ کیا اور خطے میں امن و استحکام کے لیے پاکستان کی قربانیوں کا اعتراف کیا گیا۔ اس سے قبل وفاقی وزیر داخلہ محسن نقوی اور روسی وزیر داخلہ کے درمیان ہونے والی ملاقات میں پاکستان اور روس نے ایک اہم پیش رفت کے تحت حتمی معاہدوں کی جانب بڑھنے کا فیصلہ کیا۔ دونوں ممالک نے مجرموں کی حوالگی کے معاہدے کو حتمی شکل دینے اور منظم جرائم کی روک تھام اور معلومات کے تبادلے کے لیے مفاہمت کی یادداشت پر دستخط کرنے کے عزم کا اظہار کیا۔ ملاقات میں انسداد منشیات فورس اور روسی اداروں کے درمیان تعاون بڑھانے، سائبر کرائم کے تدارک، اور تجارت و سیاحت کے لیے ویزا کے حصول کو آسان بنانے پر بھی اتفاق کیا گیا۔ علاوہ ازیں، روسی وزیر داخلہ نے نائب وزیراعظم اور وزیر خارجہ اسحاق ڈار سے بھی ملاقات کی جس میں تجارت، سرمایہ کاری، ثقافت، سیاحت اور شنگھائی تعاون تنظیم سمیت مختلف کثیرالجہتی پلیٹ فارمز پر قریبی تعاون جاری رکھنے کے عزم کا اعادہ کیا گیا۔ حالیہ برسوں میں پاکستان اور روس کے درمیان معاشی تعلقات میں نمایاں بہتری آئی ہے اور دونوں ممالک کے مابین اعلیٰ سطحی رابطے دوطرفہ شراکت داری کو مزید مستحکم کرنے کی علامت ہیں۔