بھارت میں کشتی کا حادثہ، گنگا میں ڈوب کر تیرہ بچے جاں بحق

بھارت کی ریاست بہار میں ایک انتہائی دلخراش واقعے کے دوران دریائے گنگا میں ایک اوور لوڈڈ کشتی الٹنے سے تیرہ معصوم بچے ڈوب کر جاں بحق ہو گئے۔ یہ المناک واقعہ منگل کی دیر شام ضلع ویشالی میں اس وقت پیش آیا جب یہ کشتی ایک مقامی ہندو تہوار میں شرکت کے لیے جانے والے افراد کو لے کر جا رہی تھی۔ حادثے کی اطلاع ملتے ہی مقامی دیہاتیوں نے اپنی مدد آپ کے تحت اندھیرے میں موبائل فونز کی ٹارچ اور روشنی کا استعمال کرتے ہوئے پانی میں ڈوبنے والوں کو نکالنے کی کوشش کی۔ ایک مقامی نوجوان روی یادو نے بتایا کہ اندھیرا ہونے کی وجہ سے امدادی کارروائیوں میں شدید مشکلات کا سامنا کرنا پڑا اور لوگ مدد کے لیے چیخ رہے تھے۔ ایک اور دیہاتی رام لکھن رائے کا کہنا تھا کہ کشتی سائز میں بہت چھوٹی تھی اور اس کی حالت بھی درست نہیں تھی، اس کے باوجود اس میں گنجائش سے کہیں زیادہ افراد کو سوار کیا گیا تھا جو کہ اس حادثے کی بنیادی وجہ بنی۔ مقامی صحت مرکز کے ڈاکٹر نرمل کمار نے تصدیق کی کہ حادثے کے بعد لوگوں کو طبی امداد کے لیے اسپتال منتقل کیا گیا تاہم تیرہ بچے پہلے ہی دم توڑ چکے تھے جبکہ چھ افراد کو زندہ نکال لیا گیا جن میں سے دو کی حالت تشویشناک بتائی جاتی ہے۔ ضلع ویشالی کی مجسٹریٹ ورشا سنگھ نے بھی تصدیق کی کہ انتظامیہ نے تیرہ لاشیں برآمد کر لی ہیں اور ریسکیو آپریشن مکمل کر لیا گیا ہے۔ بھارتی وزیراعظم نریندر مودی نے اس المناک حادثے پر گہرے رنج و غم کا اظہار کرتے ہوئے سوگوار خاندانوں سے تعزیت کی ہے اور متاثرہ خاندانوں کے لیے مالی معاوضے کا اعلان بھی کیا ہے۔ واضح رہے کہ بھارتی آبی گزرگاہوں پر اس طرح کے حادثات معمول بن چکے ہیں جن کی بڑی وجوہات میں کشتیوں میں گنجائش سے زیادہ افراد کا بیٹھنا، حفاظتی قوانین پر سختی سے عمل نہ ہونا اور لائف جیکٹس جیسی بنیادی سہولیات کا فقدان شامل ہے۔