کے پی حکومت کا اقدام: جعلی پی ایم ڈی سی رجسٹریشن پر 30 ڈاکٹر برطرف

پشاور: خیبر پختونخوا کی صوبائی حکومت نے صحت کے شعبے میں اصلاحات اور جعلسازی کے خلاف سخت گیر پالیسی اپناتے ہوئے ایک بڑا فیصلہ کیا ہے۔ اطلاعات کے مطابق حکومت نے جعلی پاکستان میڈیکل اینڈ ڈینزل کونسل (PMDC) رجسٹریشن کی بنیاد پر فرائض انجام دینے والے 30 ڈاکٹروں کو نوکری سے برطرف کر دیا ہے۔ اس اقدام کا مقصد صوبے کے سرکاری ہسپتالوں اور طبی اداروں میں معیار کو بہتر بنانا اور عوام کی زندگیوں کے ساتھ کھیلنے والے عناصر کا خاتمہ کرنا ہے۔صوبائی محکمہ صحت کے ذرائع کے مطابق یہ کارروائی ایک جامع تحقیقاتی عمل کے بعد عمل میں لائی گئی ہے جس میں ڈاکٹروں کی اسناد اور پی ایم ڈی سی رجسٹریشن کی جانچ پڑتال کی گئی۔ تحقیقات کے دوران انکشاف ہوا کہ یہ تمام ڈاکٹرز مبینہ طور پر جعلی یا غیر تصدیق شدہ رجسٹریشن کی بنیاد پر سرکاری اور نجی شعبے میں خدمات سر انجام دے رہے تھے جو کہ نہ صرف قوانین کی سنگین خلاف ورزی ہے بلکہ مریضوں کی زندگیوں کو خطرے میں ڈالنے کے مترادف بھی ہے۔حکومت کی جانب سے واضح کیا گیا ہے کہ صحت کے محکمے میں کرپشن، بدعنوانی اور جعلی دستاویزات پر کسی قسم کا سمجھوتہ نہیں کیا جائے گا۔ برطرف کیے جانے والے ڈاکٹروں کے خلاف مزید قانونی کارروائی کا بھی آغاز کر دیا گیا ہے تاکہ اس مکروہ دھندے میں ملوث دیگر افراد کو بھی قانون کے کٹہرے میں لایا جا سکے عوام اور سویلین حلقوں کی جانب سے حکومت کے اس فیصلے کو سراہا جا رہا ہے اور توقع ظاہر کی جا رہی ہے کہ اس طرح کے اقدامات سے طبی شعبے میں بہتری آئے گی۔