شہزادہ ہیری اور میگن مارکل کا برطانیہ میں پہلا مشترکہ دورہ

برطانیہ واپسی کے بعد شہزادہ ہیری اور میگن مارکل نے ناٹنگھم میں اپنے پہلے سرکاری دورے کے دوران عوام کے سامنے مشترکہ طور پر آ کر سب کی توجہ سمیٹ لی۔ اس موقع پر بڑی تعداد میں موجود مداحوں نے ان کا شاندار استقبال کیا اور ان کے حق میں نعرے لگائے۔ جوڑے کی ایک جھلک دیکھنے کے لیے شائقین کی طویل قطاریں لگ گئیں جو اس بات کا ثبوت ہیں کہ عوامی سطح پر ان کی مقبولیت اب بھی برقرار ہے۔ دورے کے دوران میگن مارکل نے میڈیا سے گفتگو کرتے ہوئے کہا کہ برطانیہ واپس آنا ان کے لیے بہت زبردست تجربہ ہے اور وہ یہاں آ کر بے حد خوش ہیں۔ دوسری جانب میڈیا رپورٹس کے مطابق اس دورے کے بعد شاہی محل کے اندرونی حلقوں میں ہلچل مچ گئی ہے اور بکنگھم محل کے اندر اس قسم کے نیم شاہی دوروں پر مبینہ طور پر ناپسندیدگی اور مایوسی کا اظہار بھی کیا جا رہا ہے۔ ناقدین کا کہنا ہے کہ شاہی خاندان سے علیحدگی کے بعد ان کے اس طرح کے دورے روایتی اصولوں سے ہٹ کر ہیں تاہم عام عوام کی طرف سے ملنے والی پذیرائی نے اس دورے کو انتہائی اہم بنا دیا ہے۔ ماہرین کا ماننا ہے کہ اس جوڑے کی برطانوی سرزمین پر واپسی اور عوامی اجتماعات میں شرکت آنے والے دنوں میں شاہی تعلقات پر مزید اثرات مرتب کرے گی۔