سیکیورٹی فورسز کا ضلع کرم میں خوارجی دراندازی کا کامیاب آپریشن

راولپنڈی: سیکیورٹی فورسز نے پاک افغان سرحد پر ضلع کرم کے علاقے میں فتنہ الخوارج (تحریک طالبان پاکستان) کے دہشت گردوں کی طرف سے دراندازی کی ایک اور ناپاک کوشش کو بروقت کارروائی کرتے ہوئے ناکام بنا دیا ہے۔ ذرائع کے مطابق بارڈر سیکیورٹی فورسز نے دہشت گردوں کی نقل و حرکت کا بروقت پتہ لگایا اور انتہائی پیشہ ورانہ مہارت کا مظاہرہ کرتے ہوئے ان کے عزائم کو خاک میں ملا دیا۔ اس دوران فائرنگ کا تبادلہ بھی ہوا جس میں خوارجی عناصر کو شدید نقصان اٹھانا پڑا۔ دوسری جانب، اس واقعے کے بعد پاکستانی دفتر خارجہ اور عسکری حکام کی طرف سے افغان طالبان کی پالیسیوں پر شدید تحفظات کا اظہار کیا گیا ہے۔ پاکستان نے افغان طالبان کی جانب سے ذمہ داری دوسروں پر ڈالنے اور دہشت گردی کے دیرینہ مسائل کو حل کرنے سے مسلسل انکار پر سخت برہمی کا اظہار کیا ہے۔ اسلام آباد کا مؤقف ہے کہ افغان سرزمین کو پاکستان کے خلاف استعمال ہونے سے روکنا کابل حکومت کی بنیادی ذمہ داری ہے، جس میں وہ ت حال ناکام نظر آرہی ہے۔ بارڈر کے مختلف حصوں میں جھڑپوں کا یہ سلسلہ ایسے وقت میں سامنے آیا ہے جب پاکستان نے افغان حکومت کو واضح وارننگ دی ہے کہ اگر دہشت گردی کے خطرات کا سدباب نہ کیا گیا تو ملک کی سلامتی کے دفاع کے لیے سخت اور ناقابل برداشت اقدامات اٹھائے جائیں گے۔ پاکستانی عزم واضح ہے کہ ملک کے اندر امن و امان کو سبوتاژ کرنے والے کسی بھی عناصر کو رعایت نہیں دی جائے گی اور فورسز ہر قسم کی بیرونی دراندازی کا منہ توڑ جواب دینے کے لیے ہمہ وقت تیار ہیں۔