پاکستان نے ایشین ٹیم اسکواش چیمپئن شپ جیت لی

اسلام آباد کے مصحف اسکواش کمپلیکس میں کھیلے گئے 23ویں ایشین ٹیم اسکواش چیمپئن شپ کے فائنل میں پاکستان کی مردوں کی ٹیم نے شاندار کارکردگی کا مظاہرہ کرتے ہوئے جنوبی کوریا کو 0-2 سے شکست دے دی اور ٹائٹل اپنے نام کر لیا۔ فائنل مقابلے میں پاکستانی کھلاڑیوں نے شروع سے ہی حریف کھلاڑیوں پر دباؤ بنائے رکھا اور شاندار کھیل کا مظاہرہ کیا۔ فائنل کے پہلے میچ میں پاکستان کے ابھرتے ہوئے کھلاڑی نور زمان نے جنوبی کوریا کے جیونگ من ریو کو سخت مقابلے کے بعد 11-5، 11-7 اور 13-11 سے شکست دی اور پاکستان کو برتری دلائی۔ دوسرے میچ میں تجربہ کار پاکستانی کھلاڑی محمد عاصم خان نے بھی شاندار کھیل پیش کرتے ہوئے کوریا کے سیوجن اوہ کو کسی موقع پر بھی سنبھلنے کا موقع نہیں دیا۔ عاصم خان نے یہ مقابلہ 11-6، 11-5 اور 11-4 سے اپنے نام کیا اور اس طرح مجموعی طور پر پاکستان نے فائنل میں 2-0 کی فیصلہ کن برتری حاصل کر کے چیمپئن شپ کی ٹرافی اٹھا لی۔ اس فتح پر شائقینِ کھیل میں انتہائی خوشی کی لہر دوڑ گئی اور کھلاڑیوں کی شاندار کارکردگی کو بھرپور انداز میں سراہا گیا۔ خواتین کے فائنل مقابلے میں ہانگ کانگ چائنا کی ٹیم نے ملائیشیا کو 1-2 سے شکست دے کر ایشین چیمپئن ہونے کا اعزاز حاصل کیا۔ چیمپئن شپ کے دوران مردوں کے زمرے میں ہانگ کانگ چائنا اور ملائیشیا کی ٹیموں نے کانسی کے تمغے حاصل کیے جبکہ خواتین کے زمرے میں ایران اور کوریا کی ٹیمیں برانز میڈل کی حق دار ٹھہرسیں۔ ٹورنامنٹ کے اختتام پر ایک پروقار تقریب کا انعقاد کیا گیا جس میں کھیل کی نامور شخصیات نے شرکت کی۔ چیمپئن شپ کی اختتامی تقریب میں اسکواش کے لیجنڈز جوگی علاءالدین، قمر زمان اور جہانگیر خان نے خصوصی شرکت کی۔ اس کے علاوہ ایشین اسکواش فیڈریشن کے نائب صدر عادل جاسم الغریب، پاکستان اسکواش فیڈریشن کے صدر ایئر مارشل کاظم حماد اور سینئر نائب صدر اے وی ایم سہیل اکبر بھی مہمانِ خصوصی کے طور پر موجود تھے جنہوں نے کامیابی حاصل کرنے والے کھلاڑیوں میں ٹرافیاں اور تمغے تقسیم کیے۔