فرانس میں حکومت مخالف مظاہرے، پولیس سے جھڑپیں اور گرفتاریاں

فرانس کے دارالحکومت پیرس میں حکومت مخالف مظاہروں کے دوران صورتحال اس وقت کشیدہ ہو گئی جب پولیس اور مظاہرین کے درمیان شدید جھڑپیں شروع ہو گئیں۔ حکام کی جانب سے ریلی پر پابندی عائد کیے جانے کے باوجود یلو ویسٹ تحریک کے کارکنان بڑی تعداد میں سڑکوں پر نکل آئے اور حکومتی پالیسیوں کے خلاف نعرے بازی کی۔ اس صورتحال کے پیش نظر سکیورٹی کے انتہائی سخت انتظامات کیے گئے تھے تاکہ کسی بھی ناخوشگوار واقعے سے نمٹا جا سکے۔ مظاہرین اور قانون نافذ کرنے والے اداروں کے درمیان یہ کشیدگی کچھ ہی دیر میں پرتشدد جھڑپوں میں تبدیل ہو گئی۔ پولیس نے مظاہرین کو منتشر کرنے کے لیے آنسو گیس اور واٹر کینن کا بے دریغ استعمال کیا۔ دوسری طرف مشعال بردار اور نعرے بازی کرتے ہوئے مظاہرین نے پولیس اہلکاروں پر پتھراؤ کیا اور سڑکوں پر رکاوٹیں کھڑی کرنے کی کوشش کی۔ انتظامیہ کا کہنا ہے کہ اس ریلی کو قانونی اجازت حاصل نہیں تھی اور اس سے عوامی املاک کو نقصان پہنچنے کا خدشہ تھا، اسی لیے اس پر پابندی لگائی گئی تھی۔ جھڑپوں کے دوران پولیس نے کارروائی کرتے ہوئے متعدد مظاہرین کو گرفتار کر لیا ہے جبکہ کئی مقامات پر ٹریفک کا نظام بھی شدیدمتاثر ہوا۔ یلو ویسٹ تحریک کے رہنماؤں کا کہنا ہے کہ وہ مہنگائی اور حکومتی معاشی پالیسیوں کے خلاف اپنا احتجاج پرامن طریقے سے جاری رکھنا چاہتے ہیں لیکن حکومت کی جانب سے ان کے بنیادی حقوق پر قدغن لگائی جا رہی ہے۔ بین الاقوامی خبر رساں اداروں کے مطابق فرانس میں حالیہ مہینوں کے دوران مہنگائی اور ٹیکسوں میں اضافے کے خلاف عوامی بے چینی میں مسلسل اضافہ ہو رہا ہے جس کے باعث ایسے احتجاجی مظاہرے معمول بنتے جا رہے ہیں۔ پیرس پولیس نے شہریوں سے اپیل کی ہے کہ وہ کشیدہ علاقوں کا رخ کرنے سے گریز کریں اور امن و امان برقرار رکھنے میں قانون نافذ کرنے والے اداروں کے ساتھ تعاون کریں۔ اس صورتحال کے بعد فرانسیسی سیاسی حلقوں میں بھی گرما گرم بحث شروع ہو چکی ہے اور اپوزیشن جماعتوں نے حکومت کی جانب سے احتجاج کو دبانے کے طریقہ کار پر شدید تنقید کی ہے۔