پاکستان انفارمیشن کمیشن کا قومی اسمبلی کمیٹیوں کے اخراجات ظاہر کرنے کا حکم

اسلام آباد: پاکستان انفارمیشن کمیشن (پی آئی سی) نے قومی اسمبلی سیکرٹریٹ کو ہدایت کی ہے کہ وہ پارلیمانی قائمہ کمیٹیوں اور ذیلی کمیٹیوں کے چیئرمینوں اور اراکین کے اخراجات، سفری الاؤنسز، مراعات اور سہولیات سے متعلق تفصیلی معلومات فراہم کرے۔ یہ حکم انفارمیشن کمشنر اعجاز حسن اعوان اور چیف انفارمیشن کمشنر شعیب احمد صدیقی کی جانب سے ایک صحافی سعدیہ مظہر کی جانب سے دائر کردہ اپیل پر جاری کیا گیا۔ حکم نامے کے مطابق سیکرٹری قومی اسمبلی کو رائٹ آف ایکسیس ٹو انفارمیشن ایکٹ 2017 کے تحت دس دن کے اندر تیرہ بقایا سوالات کے واضح اور مخصوص جوابات دینے کی ہدایت کی گئی ہے۔ تفصیلات کے مطابق صحافی نے رواں سال اکیس جون کو پارلیمانی کمیٹیوں کے فنکشننگ اور مالیاتی اخراجات سے متعلق معلومات کی درخواست جمع کروائی تھی۔ درخواست میں قائمہ کمیٹیوں کی فہرست، اجلاسوں کی تعداد، اجلاسوں پر ہونے والے کل اخراجات، اراکین اور چیئرمینوں کو ادا کیے جانے والے سفری الاؤنسز کے علاوہ قانون سازوں کو دی جانے والی مراعات کی مکمل تفصیلات طلب کی گئی تھیں۔ قومی اسمبلی سیکرٹریٹ کی جانب سے تسلی بخش جواب نہ ملنے پر پانچ جولائی کو پی آئی سی میں اپیل دائر کی گئی۔ کارروائی کے دوران قومی اسمبلی کی لٹی گیشن آفیسر مہرش مشتاق نے سیکرٹریٹ کی نمائندگی کی اور جوابی جمع کروائے جنہیں درخواست گزار کے ساتھ شیئر کیا گیا۔ تاہم درخواست گزار کا موقف تھا کہ کمیٹیوں کی فہرست کے پہلے سوال کے علاوہ باقی تمام تیرہ سوالات کے جوابات ادھورے ہیں۔ کمیشن نے فریقین کے دلائل سننے اور دستیاب معلومات کا جائزہ لینے کے بعد اعتراف کیا کہ اگرچہ پارلیمانی معلومات کی ایک بڑی تعداد آن لائن موجود ہے، لیکن وہ صحافی کی مخصوص درخواست کا احاطہ نہیں کرتی۔ پی آئی سی نے اس بات پر زور دیا کہ پبلک باڈیز کو انفارمیشن ایکٹ کے تحت شہریوں کی درخواستوں پر غیر مبہم، معروضی اور مخصوص جوابات فراہم کرنا ہوں گے، خواہ متعلقہ معلومات پہلے سے ہی انٹرنیٹ پر کیوں نہ ڈالی گئی ہوں۔ اس تناظر میں کمیشن نے قومی اسمبلی کے سیکرٹری کو حکم دیا ہے کہ وہ سوال نمبر دو سے چودہ تک کے مکمل جوابات دس روز کے اندر جمع کروائیں۔ آر ٹی اے ایکٹ کے سیکشن گیارہ کے تحت پاکستان کا کوئی بھی شہری کسی بھی سرکاری ادارے میں مقرر کردہ افسر کو معلومات کے حصول کے لیے درخواست جمع کر سکتا ہے۔ اس قانون کے تحت پبلک باڈی کی جانب سے جاری کردہ لائسنسوں، الاٹمنٹس، مراعات اور معاہدوں سے متعلق معلومات عام شہریوں کے لیے قابلِ رسائی اور پبلک ڈسکلوزر کے زمرے میں آتی ہیں۔ پی آئی سی کی جانب سے اس فیصلے کو پارلیمانی امور میں شفافیت کی جانب ایک اہم قدم قرار دیا جا رہا ہے اور عمل درآمد کے لیے اگلی سماعت انیس نومبر کو مقرر کی گئی ہے۔