سپریم کورٹ کا غیر قانونی بجلی کنکشنز اور چوری کی روک تھام پر زور

اسلام آباد: سپریم کورٹ نے بجلی کی چوری، غیر قانونی فروخت اور نجی طور پر بجلی کی ترسیل میں ملوث افراد کے کردار کا گہرائی سے جائزہ لینے کی شدید ضرورت پر زور دیا ہے۔ عدالت کا کہنا ہے کہ مجاز چینلز کے بجائے غیر قانونی ذرائع سے بجلی کی فراہمی کے نیٹ ورک کا باریک بینی سے احتساب کیا جانا چاہیے۔ یہ اہم مشاہدات جسٹس محمد علی مظہر اور جسٹس عرفان سعادت خان پر مشتمل سپریم کورٹ کے دو رکنی بنچ نے ایک کیس کی سماعت کے دوران جاری کردہ چھ صفحات پر مشتمل حکم نامے میں تحریر کیے۔ یہ مقدمہ لاڑکانہ کے رہائشی علی اصغر کھوکھر کی جانب سے دائر کی گئی اس فوجداری درخواست پر تھا جس میں سندھ ہائی کورٹ کے لاڑکانہ سرکٹ بنچ کی جانب سے ملزم انور علی کوری کو دی گئی ضمانت منسوخ کرنے کی استدعا کی گئی تھی۔ عدالت نے اس امر پر شدید حیرت کا اظہار کیا کہ واپڈا اور متعلقہ یوٹیلیٹی کمپنیوں کے ذمہ داران کی لاعلمی کے بغیر بجلی کی اس نوعیت کی غیر قانونی فراہمی کیسے ممکن ہو سکتی ہے۔ یہ سارا تنازع مارچ 2024 کے ایک افسوسناک واقعے سے شروع ہوا جب درخواست گزار کا بھائی پی وی سی تار ٹوٹنے اور ہائی ٹینشن لائن سے ٹکرانے کے نتیجے میں بجلی کا شدید جھٹکا لگنے سے متاثر ہوا۔ اس واقعے کے بعد لاڑکانہ کے رحمت پور پولیس اسٹیشن میں انور علی کوری اور دیگر واپڈا اہلکاروں کے خلاف ایف آئی آر درج کی گئی تھی۔ الزام یہ عائد کیا گیا تھا کہ ملزمان نے دکانوں کے اوپر سے برقی تاریں گزار کر اور ڈسپوزل فیز لائن سے خصوصی لائن جوڑ کر لوگوں کو غیر قانونی طور پر بجلی فراہم کرنے کا مذموم سلسلہ شروع کر رکھا تھا۔ سماعت کے دوران عدالت نے نوٹ کیا کہ ہائی کورٹ نے بنیادی طور پر ایف آئی آر درج کرانے میں نو ماہ کی تاخیر اور ملزم کے کردار کو غفلت کے زمرے میں دیکھ کر ضمانت منظور کی تھی۔ اس کے علاوہ تفتیشی افسر کے بیان کی روشنی میں بھی یہ نکتہ سامنے آیا تھا کہ ملزم کا واپڈا حکام سے براہ راست کوئی باضابطہ رابطہ ریکارڈ پر نہیں پایا گیا۔ عدالت نے فریقین کے دلائل سننے کے بعد قرار دیا کہ اس نوعیت کے مقدمات میں اصل حقیقت تک پہنچنے کے لیے مکمل ٹرائل اور گہرائی سے مزید تحقیقات کی ضرورت ہوتی ہے تاکہ تمام کرداروں کا اصل گناہ یا بے گناہی ثابت ہو سکے۔ سپریم کورٹ نے اپنے حکم نامے میں اس بات پر بھی روشنی ڈالی کہ دورانِ سماعت جب شکایت کنندہ سے پوچھا گیا کہ وہ اپنی دکان پر بجلی کیسے حاصل کر رہا ہے تو اس کا انکشاف تھا کہ ملزم واپڈا حکام کی ملی بھگت سے کنٹریکٹر کے طور پر کام کرتے ہوئے مالی فوائد کے عوض بجلی فراہم کر رہا تھا اور اسے کبھی کوئی باضابطہ بل موصول نہیں ہوا۔ تاہم طویل بحث کے بعد شکایت کنندہ نے خود بیان دیا کہ چونکہ معاملہ ٹرائل کورٹ میں زیر التوا ہے اس لیے وہ اب ضمانت منسوخی پر مزید اصرار نہیں کرنا چاہتا۔ سپریم کورٹ نے سندھ ہائی کورٹ کے ضمانت دینے کے فیصلے میں مداخلت کرنے سے گریز کرتے ہوئے اسے برقرار رکھا، تاہم عدالتی دفتر کو ہدایت کی کہ اس فیصلے کی ایک نقل چیئرمین واپڈا کو مزید معلومات اور ضروری کارروائی کے لیے ارسال کی جائے۔