سابق صدر آزاد کشمیر راجہ ذوالقرنین انتقال کر گئے

مظفرآباد: آزاد جموں و کشمیر کے سابق صدر راجہ محمد ذوالقرنین خان اسلام آباد کے ایک اسپتال میں مختصر علالت کے بعد ہفتہ کے روز 93 برس کی عمر میں انتقال کر گئے۔ ان کے انتقال کی خبر ملتے ہی خطے میں سیاسی و سماجی حلقوں میں گہرے رنج و غم کی لہر دوڑ گئی۔ آزاد کشمیر حکومت نے ان کے احترام میں اتوار کے روز ایک دن کے سرکاری سوگ کا اعلان کیا ہے جس کے دوران سرکاری عمارات پر قومی پرچم سرنگوں رہے گا۔ حکومت کی جانب سے یہ بھی ہدایات جاری کی گئی ہیں کہ ان کی نمازِ جنازہ اتوار کی صبح گیارہ بجے ادا کی جائے گی اور انہیں ان کے آبائی شہر کسمگوم، ضلع بھمبر میں پورے سرکاری اعزاز کے ساتھ سپردِ خاک کیا جائے گا۔ 15 مارچ 1933 کو پیدا ہونے والے راجہ ذوالقرنین خان کا تعلق چیب راجپوت خاندان سے تھا۔ انہوں نے اپنی ابتدائی تعلیم سری نگر اور دہلی سے حاصل کی اور بعد ازاں گورنمنٹ کالج لاہور سے گریجویشن مکمل کیا۔ اپنے دورِ جوانی میں انہوں نے تعمیراتی کے شعبے میں قدم رکھا اور کراچی میں یونائٹڈ بلڈرز کی بنیاد رکھی جس نے پاکستان، آزاد کشمیر، متحدہ عرب امارات اور عراق میں کئی اہم پراجیکٹس مکمل کیے۔ سیاست میں انہوں نے 1960 کی دہائی کے اوائل میں کے ایچ خورشید کے ساتھ شمولیت اختیار کی اور بنیادی جمہوریت کے نظام کے تحت اپنے آبائی یونین کونسل کسمگوم کے چیئرمین منتخب ہوئے۔ راجہ ذوالقرنین کا سیاسی کیریئر کئی دہائیوں پر محیط رہا۔ وہ 1975 میں پاکستان پیپلز پارٹی کے پلیٹ فارم سے قانون ساز اسمبلی کے رکن منتخب ہوئے، اور بعد میں مسلم کانفرنس میں شمولیت اختیار کرتے ہوئے 1985 اور 1991 کے انتخابات میں کامیابی حاصل کی اور مختلف وزارتوں میں خدمات انجام دیں۔ اگست 2006 میں مسلم کانفرنس نے انہیں آزاد کشمیر کا صدر منتخب کیا، جس منصب پر وہ اگست 2011 تک فائز رہے۔ انہوں نے اپنی زندگی کا بیشتر حصہ کشمیر کی سیاست اور فلاح و بہبود کے لیے وقف کیا۔ ان کے انتقال پر آزاد جموں و کشمیر قانون ساز اسمبلی کے اسپیکر چوہدری طارق فاروق اور سابق وزیراعظم سردار تنویر الیاس سمیت کئی اہم سیاسی شخصیات نے گہرے دکھ اور افسوس کا اظہار کیا ہے۔ رہنماؤں نے اپنے تعزیتی پیغام میں کہا کہ راجہ ذوالقرنین کی خدمات کو ہمیشہ یاد رکھا جائے گا اور ان کا انتقال جموں و کشمیر کے سیاسی اور پارلیمانی حلقوں کے لیے ایک بہت بڑا نقصان ہے۔