یوم اقبال پر عام تعطیل، وفاقی حکومت کا نوٹیفیکیشن جاری

اسلام آباد: وفاقی حکومت نے قومی شاعر، مفکرِ پاکستان اور شاعرِ مشرق حکیم الامت ڈاکٹر علامہ محمد اقبال کے یومِ ولادت کے موقع پر 9 نومبر کو ملک بھر میں عام تعطیل کا باضابطہ اعلان کر دیا ہے۔ حکومت کی جانب سے جاری کردہ اعلامیے کے مطابق اس روز ملک بھر میں تمام سرکاری، نیم سرکاری دفاتر اور تعلیمی ادارے بند رہیں گے۔ اس فیصلے کا مقصد قوم کے اس عظیم محسن اور فلسفی کو خراجِ تحسین پیش کرنا ہے جنہوں نے برصغیر کے مسلمانوں کے لیے الگ وطن کا خواب دیکھا اور اپنی شاعری کے ذریعے نوجوانوں میں بیداری کی روح پھونکی۔ یومِ اقبال کے موقع پر ملک بھر میں مختلف تقریبات، سیمینارز اور مجالس کا انعقاد کیا جائے گا جن میں علامہ اقبال کی زندگی، ان کی علمی و ادبی خدمات اور تحریکِ پاکستان میں ان کے تاریخی کردار پر روشنی ڈالی جائے گی۔ تعلیمی اداروں میں خصوصی طور پر تقاریب منعقد ہوں گی جہاں طلباء و طالبات شاعری، تقاریر اور ملی نغموں کے ذریعے اپنے ملی جذبے کا اظہار کریں گے اور علامہ اقبال کے فلسفہِ خودی کو سمجھنے کی کوشش کریں گے۔ حکومت کے اس اقدام کو عوام اور مختلف طبقہ ہائے فکر کی طرف سے سراہا جا رہا ہے کیونکہ 9 نومبر کا دن پاکستانی قوم کے لیے تجدیدِ عہد کا دن ہے۔ اس روز ہر پاکستانی اس عزم کا اعادہ کرتا ہے کہ وہ علامہ اقبال کے ارشادات اور قائد اعظم کے فرمودات کی روشنی میں ملک کی ترقی، خوشحالی اور استحکام کے لیے بھرپور کردار ادا کرے گا۔ تمام صوبائی دارالحکومتوں اور دیگر چھوٹے بڑے شہروں میں اس دن کے حوالے سے خصوصی تیاریاں مکمل کی جا چکی ہیں تاکہ اس قومی دن کو شایانِ شان طریقے سے منایا جا سکے گا۔