مریم نواز نے امتحان ملتوی کرنے پر جہلم کے ڈی سی کو ہٹا دیا

لاہور: پنجاب کی وزیر اعلیٰ مریم نواز شریف نے اپنے دورہ جہلم کے پیش نظر انٹرمیڈیٹ کا امتحانی پرچہ ملتوی کیے جانے کے واقعے کا سخت نوٹس لیتے ہوئے ڈپٹی کمشنر جہلم کو فوری طور پر عہدے سے ہٹا دیا ہے۔ میڈیا رپورٹس اور سرکاری ذرائع کے مطابق ضلع جہلم میں انٹرمیڈیٹ کے دوسرے سالانہ امتحانات 2026 کے سلسلے میں 10 نومبر کو ہونے والا کمپیوٹر سائنس کا پرچہ ڈپٹی کمشنر میر رضا اوضگن کی سفارش پر ملتوی کر دیا گیا تھا۔ اس حوالے سے راولپنڈی بورڈ آف انٹرمیڈیٹ اینڈ سیکنڈری ایجوکیشن کو ایک خط بھی لکھا گیا تھا جس میں مؤقف اختیار کیا گیا تھا کہ وزیر اعلیٰ کے دورے کے دوران انتظامی اور سیکیورٹی عملے کی تعیناتی کے باعث امتحانات کا پرامن اور بلا تعطل انعقاد ممکن نہیں ہے۔ خط میں انتظامی مشکلات سے بچنے کے لیے پرچہ کسی اور مناسب تاریخ پر منتقل کرنے کی درخواست کی گئی تھی، جس پر سوشل میڈیا پر بھی شدید تنقید کی گئی تھی۔ واقعے کا علم ہوتے ہی وزیر اعلیٰ مریم نواز نے سوشل میڈیا پر اپنے پیغام میں اس فیصلے پر سخت برہمی کا اظہار کیا اور اعلان کیا کہ ڈپٹی کمشنر کو فوری طور پر ان کے عہدے سے ہٹایا جا رہا ہے۔ انہوں نے کہا کہ ان کی طرف سے واضح احکامات جاری کیے گئے تھے کہ دوروں کے دوران عوام کو کسی قسم کی زحمت یا پریشانی کا سامنا نہیں ہونا چاہیے، اور یہ اقدام ان ہدایات کی صریح خلاف ورزی ہے۔ بعد ازاں، مریم نواز نے ایک اور پوسٹ میں تبادلے کا نوٹیفکیشن بھی شیئر کیا جس کے مطابق معزول ڈی سی کو پنجاب سروسز اینڈ جنرل ایڈمنسٹریشن ڈیپارٹمنٹ رپورٹ کرنے کی ہدایت کی گئی ہے۔ وزیر اعلیٰ نے یہ بھی واضح کیا کہ ملتوی کیے گئے امتحانات اب اپنے طے شدہ شیڈول کے مطابق ہی ہوں گے۔ انہوں نے مزید کہا کہ ضلعی انتظامیہ کی جانب سے کی جانے والی اس حماقت کے باوجود امتحانات میں کوئی تبدیلی نہیں کی جائے گی اور پرچہ اپنے مقررہ وقت پر ہی منعقد ہوگا۔ اس سخت اور بروقت اقدام کو عوامی حلقوں اور طلباء کی طرف سے سراہا گیا ہے جنہوں نے امتحانات کے بروقت انعقاد پر اطمینان کا اظہار کیا ہے۔