وزیراعلیٰ پنجاب کا بڑا اقدام، ڈی سی جہلم کو عہدے سے ہٹا دیا گیا

وزیر اعلیٰ پنجاب مریم نواز شریف نے جہلم کے ڈپٹی کمشنر میر رضا اوجھگن کو ان کے عہدے سے ہٹا دیا ہے۔ یہ فیصلہ اس وقت سامنے آیا جب ڈپٹی کمشنر کی جانب سے مبینہ طور پر وزیر اعلیٰ کے دورے کے پیش نظر انٹرمیڈیٹ کے امتحانی پرچے کو ملتوی کرنے یا امتحانی مرکز تبدیل کرنے کی درخواست کی گئی تھی۔ راولپنڈی بورڈ آف انرمیڈیٹ اینڈ سیکنڈری ایجوکیشن (RBISE) نے اس سلسلے میں ضلع جہلم میں 10 نومبر کو ہونے والے کمپیوٹر سائنس کے امتحانی پرچے ملتوی کرنے کا اعلان بھی کیا تھا۔ اس تمام صورتحال کا سختی سے نوٹس لیتے ہوئے صوبائی حکومت نے اسے انتظامی طور پر غیر ذمہ دارانہ اور غیر ضروری قدم قرار دیا ہے۔ حکومت کا ماننا ہے کہ سیاسی یا انتظامی دوروں کی وجہ سے تعلیمی سرگرمیوں یا طلباء کے امتحانات کو متاثر کرنا کسی صورت قابل قبول نہیں ہے۔ اس فیصلے کے بعد سیاسی اور سماجی حلقوں میں بھی اس اقدام پر بحث شروع ہو گئی ہے اور شفاف انتظامی امور کی انجام دہی پر زور دیا جا رہا ہے۔ مزید برآں، انتظامی امور کو بہتر بنانے اور اس قسم کے فیصلوں سے گریز کرنے کے لیے متعلقہ حکام کو سخت ہدایات بھی جاری کی گئی ہیں تاکہ مستقبل میں طلباء کے تعلیمی مستقبل کے ساتھ اس طرح کی صورتحال پیدا نہ ہو۔