مصر میں ٹرین حادثہ: گیزا کے قریب تصادم میں 4 ہلاک، 88 زخمی

مصر کے دارالحکومت قاہرہ کے قریب اتوار کے روز دو مسافر ٹرینیں آپس میں ٹکرا گئیں جس کے نتیجے میں متعدد بوگیاں پٹڑی سے اتر گئیں۔ مصری وزارت صحت اور ریلوے حکام کے مطابق اس خوفناک حادثے میں ابتدائی طور پر چار مسافر جاں بحق جبکہ اٹھاسی افراد زخمی ہوئے ہیں جنہیں گیزا اورگردونواح کے ہسپتالوں میں طبی امداد فراہم کی جا رہی ہے۔ اس سے قبل سرکاری میڈیا نے زخمیوں کی تعداد ایک سو بیس بتائی تھی تاہم بعد میں تصدیق شدہ اعداد و شمار جاری کیے گئے۔ مصری ریلوے اتھارٹی نے تفصیلات بتاتے ہوئے کہا کہ گیزا سے فیوم جانے والی ٹرین پیچھے سے قاہرہ سے اسوان جانے والی دوسری ٹرین سے ٹکرا گئی جس کے بعد امدادی کارروائیوں کا آغاز کر دیا گیا۔ جائے وقوعہ پر امدادی ٹیموں نے کرینوں کی مدد سے ملبے کو ہٹانے کا کام مکمل کیا اور مسافروں کو محفوظ مقامات پر منتقل کیا۔ مصر کے صدر عبدالفتاح السیسی نے اس المناک حادثے پر گہرے دکھ اور تشویش کا اظہار کرتے ہوئے متعلقہ حکام کو فوری تحقیقات کی ہدایت کی ہے تاکہ غفلت برٹنے والوں کا تعین کر کے انہیں قانون کے کٹہرے میں لایا جا سکے۔ انہوں نے زخمیوں کو بہترین طبی سہولیات فراہم کرنے کی بھی ہدایت جاری کی ہیں۔ واضح رہے کہ یہ حادثہ گیزا کے علاقے العیاط میں پیش آیا جو ماضی میں بھی ٹرین حادثات کی وجہ سے جانی نقصان کا شکار رہ چکا ہے۔ سن دو ہزار دو میں اسی علاقے میں ٹرین میں آگ لگنے کے باعث تین سو سے زائد افراد جان کی بازی ہار گئے تھے۔ مصر کی ایک کروڑ دس لاکھ سے زائد آبادی اپنے روزمرہ کے سفر کے لیے ریلوے نظام پر انحصار کرتی ہے، تاہم طویل عرصے سے خستہ حال انفراسٹرکچر اور پرانے سگنلنگ سسٹم کی وجہ سے ملک میں اکثر ٹرین حادثات رونما ہوتے رہتے ہیں۔ اگرچہ گزشتہ ایک دہائی کے دوران حکومت نے سڑکوں اور نئے تیز رفتار ریل منصوبوں پر اربوں ڈالر کی سرمایہ کاری کی ہے، تاہم ملک کا پرانا ریلوے نیٹ ورک تاحال مکمل اور جامع اوور ہالنگ کا منتظر ہے۔ دریں اثنا، پاکستان سمیت دنیا بھر کے مختلف ممالک کی طرف سے اس دلخراش حادثے پر گہرے رنج و غم کا اظہار کیا گیا ہے اور مصری عوام کے ساتھ مکمل یکجہتی کا اعادہ کیا گیا ہے۔