انتخابی اصلاحات کمیٹی کی تشکیل، حکمران اتحاد نے نام جمع کرا دیے

اسلام آباد میں حکمران اتحاد نے انتخابی اصلاحات کے لیے مجوزہ پارلیمانی کمیٹی کی تشکیل کی سمت میں ایک اہم پیش رفت کرتے ہوئے اپنے نامزد ارکان کی فہرست جمع کرا دی ہے، تاہم اپوزیشن جماعتوں کی جانب سے تاحال ناموں کا اعلان نہیں کیا گیا۔ پارلیمانی امور کے وفاقی وزیر ڈاکٹر طارق فضل چوہدری نے تصدیق کی ہے کہ انہیں پیپلز پارٹی سمیت تمام اہم اتحادی جماعتوں کی جانب سے نام موصول ہو چکے ہیں۔ انہوں نے بتایا کہ 30 ارکان پر مشتمل یہ کمیٹی قومی اسمبلی اور سینیٹ کے ارکان پر مشتمل ہوگی جسے دونوں ایوانوں میں جماعتوں کی پارلیمانی طاقت کے تناسب سے نمائندگی دی جائے گی۔ اس طے شدہ فارمولے کے تحت پیپلز پارٹی کو کمیٹی میں 7 جبکہ مسلم لیگ ن کو 10 نشستیں دی جائیں گی، البتہ مسلم لیگ ن کو چھوٹی جماعتوں کو ایڈجسٹ کرنے کے لیے اپنی کچھ نشستیں قربان کرنا پڑ سکتی ہیں۔دوسری جانب، اپوزیشن جماعتوں بالخصوص پاکستان تحریک انصاف (پی ٹی آئی) نے تاحال اس کمیٹی کے لیے اپنے نامزد ارکان کی فہرست فراہم نہیں کی ہے۔ وفاقی وزیر نے بتایا کہ انہوں نے پی ٹی آئی کے چیف وہپ عامر ڈوگر سے رابطہ کرکے نام طلب کیے تھے جنہوں نے اس کے لیے کچھ مہلت مانگی ہے۔ جمیعت علماء اسلام (جے یو آئی ایف) کی طرف سے بھی تاحال نام فائنل نہیں کیے گئے۔ پی ٹی آئی کی جانب سے کمیٹی کی تشکیل پر کچھ تحفظات کا اظہار کیا گیا ہے، جس پر حکومت نے واضح کیا ہے کہ ماضی کی تمام پارلیمانی کمیٹیوں کی تشکیل اسی متناسب فارمولے کے تحت عمل میں آئی تھی۔ وزیر پارلیمانی امور نے امید ظاہر کی ہے کہ پی ٹی آئی اس معاملے پر آئندہ ہفتے تک اپنا حتمی فیصلہ صادر کر دے گی۔پی ٹی آئی کے انفارمیشن سیکریٹری شیخ وقاص اکرم کا کہنا ہے کہ ان کی جماعت ملک میں حقیقی انتخابی اصلاحات چاہتی ہے لیکن انہیں خدشہ ہے کہ حکومت اس عمل کو صرف قانونی جواز فراہم کرنے کے لیے استعمال کرنا چاہتی ہے۔ انہوں نے کہا کہ کمیٹی میں اپوزیشن کو محدود نشستیں ملنے سے ان کی تجاویز مؤثر طریقے سے نافذ نہیں ہو سکیں گی۔ پارٹی کے اندرونی معاملات اور چیئرمین پی ٹی آئی کی صحت سے متعلق مصروفیت کے باعث اس معاملے پر حتمی مشاورت میں کچھ تاخیر ہوئی ہے، تاہم پی ٹی آئی کے کور اور پارلیمانی کمیٹیوں کے اجلاس جلد طلب کرکے اس میں شرکت یا عدم شرکت کا حتمی فیصلہ کیا جائے گا۔دریں اثنا، جے یو آئی ایف کے ترجمان اسلم غوری نے بھی تصدیق کی ہے کہ ان کی جماعت نے تاحال پارلیمانی کمیٹی برائے انتخابی اصلاحات میں شرکت کے حوالے سے کوئی باضابطہ فیصلہ نہیں کیا اور اس معاملے کو پارٹی کی مجلس عاملہ کے آئندہ اجلاس میں زیر بحث لایا جائے گا۔