سکاٹ بیسنٹ فوجی رہائش گاہ منتقل، ایرانی خطرات کا معاملہ

واشنگتن سے موصول ہونے والی اطلاعات کے مطابق امریکی وزیر خزانہ سکاٹ بیسنٹ کو ایرانی خطرات کے پیش نظر ان کی رہائش گاہ سے نکال کر ایک محفوظ فوجی اڈے پر منتقل کر دیا گیا ہے۔ یہ اقدام سیکیورٹی کے سخت ترین انتظامات کے تحت اٹھایا گیا ہے تاکہ کسی بھی ممکنہ خطرے سے بروقت نمٹا جا سکے اور حکومتی شخصیات کے تحفظ کو یقینی بنایا جا سکے۔ بلومبرگ اور نیویارک ٹائمز سمیت کئی بین الاقوامی نشریاتی اداروں نے اس بات کی تصدیق کی ہے کہ سکاٹ بیسنٹ کو واشنگتن کے قریب واقع ان کے گھر سے منتقل کر کے فوجی کیمپ میں رکھا گیا ہے۔ ایرانی حکام کی جانب سے مبینہ دھمکیوں کے بعد امریکی حکومت نے ملکی اور غیر ملکی سطح پر اہم ترین شخصیات کی سیکیورٹی کا از سر نو جائزہ لیا ہے، جس کے بعد یہ فیصلہ کیا گیا۔ اطلاعات کے مطابق موجودہ امریکی انتظامیہ کے دیگر کئی اہم ارکان اور عہدیدار بھی سیکیورٹی خدشات کے پیش نظر پہلے ہی سے فوجی اڈوں پر رہائش پذیر ہیں۔ ان عہدیداروں میں ٹوڈ بلانچ سمیت انتظامیہ کے کئی دیگر نمایاں نام بھی شامل ہیں جو حفاظتی نقطہ نظر سے فوجی چھائونیوں یا محفوظ فوجی رہائش گاہوں میں مقیم ہیں۔ سیکیورٹی ایجنسیاں اس پورے معاملے پر گہری نظر رکھے ہوئے ہیں اور امریکی وزارت خزانہ یا دیگر متعلقہ اداروں کی طرف سے اس تبدیلی کو انتہائی خفیہ اور حساس نوعیت کا قرار دیا جا رہا ہے۔ سیاسی حلقوں میں اس منتقلی کو واشنگتن اور تہران کے درمیان بڑھتی ہوئی کشیدگی کا ایک اور عملی مظہر قرار دیا جا رہا ہے، جہاں امریکی حکام اپنی سلامتی کے حوالے سے انتہائی محتاط حکمت عملی اپنا رہے ہیں۔