روسی عدالت کا بڑا فیصلہ، انسانی حقوق کی وکیل کو 12 سال قید

ماسکو: روس کی ایک عدالت نے انسانی حقوق کی ایک خاتون وکیل کو غداری کے الزامات کے تحت 12 سال قید کی سزا سنا دی ہے۔ یہ فیصلہ ایسے وقت میں سامنے آیا ہے جب ملک میں سکیورٹی اور ریاستی امور سے متعلق مقدمات میں سخت سزاؤں کا سلسلہ جاری ہے۔ اس عدالتی کارروائی نے ملکی اور بین الاقوامی سطح پر انسانی حقوق کی تنظیموں کی توجہ مبذول کروا لی ہے۔ استغاثہ کے وکلا کا کہنا تھا کہ ملزمہ نے مبینہ طور پر ملک کی سلامتی سے جڑی حساس اور خفیہ تفصیلات یوکرین کو فراہم کی تھیں، جو روسی فیڈریشن کی سلامتی کے لیے نقصان دہ ثابت ہو سکتی ہیں۔ پراسیکیوشن کا مؤقف تھا کہ جنگی حالات اور کشیدہ سیاسی ماحول میں اس نوعیت کی معلومات کی فراہمی سنگین غداری کے زمرے میں آتی ہے، جس پر کڑی سزا دی جانا ضروری تھی۔ دوسری جانب، ملزمہ کے دفاعی وکلا نے تمام الزامات کو یکسر مسترد کرتے ہوئے عدالت میں دلائل دیے کہ جو معلومات فراہم کرنے کا دعویٰ کیا جا رہا ہے، وہ نہ تو خفیہ تھیں اور نہ ہی ان سے ریاستی سلامتی کو کوئی خطرہ لاحق ہوا۔ وکلا کا کہنا تھا کہ یہ مقدمہ حقائق کے برعکس اور سیاسی بنیادوں پر قائم کیا گیا ہے، جس کا مقصد انسانی حقوق کے کارکنان کو خاموش کرانا ہے۔ عدالت نے فریقین کے دلائل سننے کے بعد قانون کے مطابق فیصلہ سناتے ہوئے خاتون وکیل کو 12 سال قید کی سزا کا حکم دیا۔ اس فیصلے کے بعد قانونی حلقوں میں تشویش کی لہر دوڑ گئی ہے جبکہ انسانی حقوق کے بین الاقوامی اداروں نے اس فیصلے پر سخت ردعمل کا اظہار کرتے ہوئے فوری نظرثانی کا مطالبہ کیا ہے۔