غزہ میں شدید سردی اور پابندیوں سے فلسطینی بچہ جاں بحق

غزہ میں جاری شدید انسانی بحران کے دوران اسرائیلی پابندیوں اور کڑاکے کی سردی کے باعث ایک اور معصوم زندگی ضائع ہو گئی۔ جنوبی غزہ میں عارضی خیمے کے اندر رہنے والے ایک فلسطینی خاندان کا شیرخوار بچہ شدید سردی اور مناسب سہولیات نہ ہونے کے باعث ہائپوتھرمیا کا شکار ہو کر راتوں رات جاں بحق ہوگیا۔ بچے کے والد نے افسوس ناک واقعے کی تصدیق کرتے ہوئے بتایا کہ سخت سردی اور گرم ملبوسات یا ہیٹنگ کا کوئی انتظام نہ ہونے کی وجہ سے ان کے بیٹے کی جان چلی گئی۔ غزہ میں جاری جنگ اور اسرائیلی پابندیوں نے پہلے ہی لاکھوں افراد کو بے گھر کر رکھا ہے اور وہ خیموں میں انتہائی کسمپرسی کی زندگی گزارنے پر مجبور ہیں۔ ماہرین اور بین الاقوامی تنظیمیں طویل عرصے سے خبردار کرتی آ رہی ہیں کہ غزہ میں امدادی سامان، ایندھن اور طبی امداد کی عدم دستیابی بالخصوص سردیوں کے موسم میں بچوں اور بزرگوں کے لیے جان لیوا ثابت ہو سکتی ہے۔ غزہ کے پٹی بھر میں لاکھوں افراد اس وقت خیموں اور کھلے آسمان تلے رہنے پر مجبور ہیں، جہاں بارش اور سردی سے بچاؤ کا کوئی مؤثر انتظام موجود نہیں۔ اس المناک واقعے کے بعد مقامی اور بین الاقوامی انسانی حقوق کے اداروں نے ایک بار پھر عالمی برادری سے فوری مداخلت کا مطالبہ کیا ہے تاکہ غزہ کے محاصرے کو ختم کر کے خیمہ بستیوں میں رہنے والے متاثرین بالخصوص بچوں کے لیے فوری طور پر خوراک، ادویات، گرم کپڑے اور ایندھن کی فراہمی کو یقینی بنایا جا سکے ورنہ ایسے دردناک واقعات میں مزید اضافے کا خدشہ ہے۔