امریکہ ایران سائبر جنگ: واٹر پلانٹس کی ہیکنگ اور توانائی کے اثاثوں کو خطرہ

واشنگٹن اور تہران کے درمیان کشیدگی میں ایک بار پھر خطرناک حد تک اضافہ ہو چکا ہے جب اطلاعات کے مطابق ایران کی جانب سے امریکہ کے توانائی کے اہم اثاثوں کو نشانہ بنانے کا عزم ظاہر کیا گیا ہے۔ حالیہ دنوں میں امریکہ کے مختلف حصوں میں پانی کے نظام اور واٹر پلانٹس پر سائبر حملوں کی اطلاعات موصول ہوئی ہیں جن سے امریکی سکیورٹی اداروں میں شدید تشویش پائی جاتی ہے۔ رپورٹس کے مطابق اس سائبر کارروائی کے ذریعے کم از کم سات امریکی ریاستوں میں واٹر ٹریٹمنٹ پلانٹس کو ہیک کرنے اور پانی کے نظام کو متاثر کرنے کی کوشش کی گئی۔ سیکورٹی ماہرین کا کہنا ہے کہ یہ حملے دونوںممالک کے درمیان جاری سائبر جنگ کا ایک نیا اور خطرناک باب ہیں۔ تنازعے کی یہ لہر اس وقت مزید تیز ہوئی جب مبینہ طور پر جون کے مہینے میں امریکہ کی جانب سے ایک ایرانی واٹر پلانٹ کو مبینہ طور پر تباہ کیا گیا تھا جس کے نتیجے میں بیس ہزار افراد پانی کی فراہمی سے محروم ہو گئے تھے۔ اس واقعے کے محض ایک دن کے اندر اندر امریکہ کے اندرونی حصوں خصوصاً کیلیفورنیا میں چار واٹر سسٹمز کو سکیورٹی کی خلاف ورزی کا سامنا کرنا پڑا اور اب منیسٹا سمیت دیگر ریاستوں میں بھی اس طرح کے واقعات سامنے آ رہے ہیں۔ امریکی حکام اس صورتحال کا باریک بینی سے جائزہ لے رہے ہیں اور اہم تنصیبات کی سائبر سکیورٹی کو مزید سخت کرنے کے اقدامات کیے جا رہے ہیں۔ ماہرین کا ماننا ہے کہ اگر بنیادی ڈھانچے پر اس قسم کے حملے جاری رہے تو اس کے دور رس نتائج برآمد ہو سکتے ہیں اور دونوں ممالک کے درمیان عسکری محاذ آرائی میں مزید تیزی آ سکتی ہے۔