یوفا اور فیفا کشیدگی: نجی سرمایہ کاری کے منصوبے پر قانونی کارروائی کا انتباہ

یورپی فٹ بال ایسوسی ایشن (یوفا) نے عالمی فٹ بال باڈی (فیفا) کے صدر جانی انفانتینو کے اس منصوبے پر شدید تحفظات کا اظہار کرتے ہوئے قانونی کارروائی کی دھمکی دی ہے جس میں فیفا کے اہم مقابلوں کے حصص نجی سرمایہ کاروں کو فروخت کرنے کی تجویز دی گئی تھی۔ اس کشیدگی نے بین الاقوامی فٹ بال کے حلقوں میں ایک نیا پینڈورا باکس کھول دیا ہے اور دونوں بڑی تنظیموں کے درمیان تعلقات میں ایک بار پھر تناؤ پیدا ہو گیا ہے۔ ذرائع کے مطابق فیفا کے صدر جانی انفانتینو نجی سرمایہ کاری کے ذریعے تنظیم کی مالی حالت کو مزید مستحکم کرنا چاہتے تھے اور دنیا بھر میں ٹورنامنٹس کے دائرہ کار کو پھیلانا مقصود تھا۔ تاہم یوفا کی قیادت نے اس قدم کو کھیلوں کی روح اور روایتی ڈھانچے کے منافی قرار دیا ہے۔ یوفا کا مؤقف ہے کہ اس طرح کے اہم فیصلوں سے فٹ بال کے کھیل پر کارپوریٹ اداروں کا غلبہ بڑھ جائے گا جو کہ عام شائقین اور کلبوں کے مفاد میں نہیں ہے۔ یوفا کی جانب سے جاری کردہ بیان میں واضح کیا گیا ہے کہ اگر فیفا نے اس طرح کے کسی بھی منصوبے پر عمل درآمد کرنے کی کوشش کی تو وہ اپنے حقوق کے تحفظ کے لیے تمام ممکنہ قانونی راستے اختیار کرنے سے گریز نہیں کریں گے۔ یہ تنازع ایسے وقت میں سامنے آیا ہے جب عالمی سطح پر فٹ بال کے مالیاتی ماڈل اور کیلنڈر پر پہلے ہی مختلف اسٹیک ہولڈرز کے درمیان گہرے اختلافات پائے جاتے ہیں۔ فٹ بال کے ماہرین کا ماننا ہے کہ یوفا اور فیفا کے درمیان یہ محاذ آرائی آنے والے دنوں میں مزید شدت اختیار کر سکتی ہے، کیونکہ کھیلوں کی دنیا میں تجارتی حقوق اور منافع کی تقسیم کے معاملات انتہائی حسساس نوعیت کے حامل ہوتے ہیں۔ اب دیکھنا یہ ہوگا کہ جانی انفانتینو اس سخت مخالفت کے بعد اپنے مجوزہ منصوبے میں کیا تبدیلیاں لاتے ہیں یا اس کو مکمل طور پر ترک کرتے ہیں۔