پاکستان اسٹاک ایکسچینج میں نمایاں تیزی، 2,100 پوائنٹس کا اضافہ

پاکستان اسٹاک ایکسچینج (پی ایس ایکس) میں کاروباری ہفتے کے پہلے روز زبردست تیزی کا رجحان دیکھا گیا اور سرمایہ کاروں کی گہری دلچسپی کے باعث بینچ مارک کے ایس ای 100 انڈیکس میں 2,100 سے زائد پوائنٹس کا شاندار اضافہ ریکارڈ کیا گیا۔ اس تیزی کے نتیجے میں انڈیکس 178,000 کی اہم حد عبور کرنے میں کامیاب رہا۔ مارکیٹ کے آغاز پر ہی تیزی کا جو سلسلہ شروع ہوا تھا وہ دن بھر کے اتار چڑھاؤ کے باوجود اختتام تک برقرار رہا۔ مالیاتی ماہرین کے مطابق عالمی منڈی میں تیل کی قیمتوں میں کمی اور امریکہ اور ایران کے درمیان بڑھتی ہوئی کشیدگی میں کمی کے اشاروں نے سرمایہ کاروں کے حوصلے بلند کیے۔ امریکہ کے صدر کی جانب سے ایران کے ساتھ نئے مذاکرات کے آغاز کے اعلان کے بعد عالمی منڈی میں خام تیل کی قیمتوں میں گراوٹ آئی، جس کے نتیجے میں پاکستان سمیت عالمی معیشتوں میں سرمایہ کاری کا خطرہ مول لینے کا رجحان پھر سے بحال ہوا۔ ٹاپ لائن سیکیورٹیز کے مطابق ایف ایف سی، ایم ای بی ایل، لکی سیمنٹ، پی پی ایل اور اینگرو کارپوریشن اس تیزی میں سرفہرست رہے جنہوں نے مجموعی طور پر انڈیکس میں تقریباً 699 پوائنٹس کا اضافہ کیا۔ بازار میں کاروباری سرگرمیوں میں بھی نمایاں بہتری دیکھنے میں آئی جہاں کل حجم 785 ملین حصص تک پہنچ گیا جبکہ کاروبار کی مالیت 33 ارب روپےرہی۔ اے کے ڈی سیکیورٹیز کے ریسرچ ڈائریکٹر اویس اشرف کا کہنا ہے کہ سرمایہ کاروں کی مثبت سوچ اور توقعات نے پچھلے ہفتے کے رجحان کو آگے بڑھایا ہے۔ انہوں نے مزید کہا کہ جولائی میں مہنگائی کے واحد ہندسے میں واپس آنے کی توقعات نے بھی مارکیٹ کو اضافی تقویت بخشی ہے جس سے مانیٹری پالیسی میں نرمی کی امیدیں بڑھ گئی ہیں۔ یاد رہے کہ اس سے قبل جولائی کے مہینے میں امریکہ اور ایران کی کشیدگی کی وجہ سے تیل کی قیمتیں بڑھنے پر انڈیکس میں کچھ کمی دیکھی گئی تھی، تاہم اب نئے سیاسی اور معاشی اشاروں کے بعد مارکیٹ نے ایک بار پھر مضبوطی کا مظاہرہ کیا ہے۔