پاکستان میں شدید بارشوں اور سیلاب کا خطرہ، این ڈی ایم اے الرٹ

لاہور: ملک کے مختلف حصوں میں مون سون کی شدید بارشوں کے نئے سلسلے کے پیش نظر محکمہ موسمیات نے اربن فلڈنگ اور نشیبی علاقوں میں پانی جمع ہونے کی وارننگ جاری کر دی ہے۔ فلڈ فورکاسٹنگ ڈویژن کے مطابق اسلام آباد، راولپنڈی، لاہور، فیصل آباد، ملتان اور پشاور سمیت کئی اہم شہروں میں بادل جم کر برس سکتے ہیں جس سے ندی نالوں میں طغیانی کا خطرہ بڑھ گیا ہے۔ دریائے جہلم، چناب اور راوی کے الحاق والے نالوں میں درمیانے سے اونچے درجے کے سیلاب کی توقع کی جا رہی ہے۔ حکام نے تمام متعلقہ اداروں کو الرٹ رہنے اور ہنگامی صورتحال سے نمٹنے کے لیے قبل از وقت انتظامات مکمل کرنے کی ہدایت کی ہے۔ محکمہ موسمیات کا کہنا ہے کہ کشمیر، مری، گلیات، شمال مشرقی پنجاب اور خیبر پختونخوا کے پہاڑی نالوں میں فلیش فلڈنگ کا خدشہ ہے۔ اس کے علاوہ بالائی علاقوں کے پہاڑی اضلاع میں لینڈ سلائیڈنگ کا بھی خطرہ موجود ہے جس سے ٹریفک کی روانی متاثر ہو سکتی ہے۔ دوسری جانب تربیلا اور چشمہ کے آبی ذخائر اپنی زیادہ سے زیادہ سطح کے قریب پہنچ چکے ہیں۔ واپڈا کے اعداد و شمار کے مطابق تربیلا ڈیم میں پانی کی سطح ڈیڑھ ہزار فٹ سے تجاوز کر گئی ہے جو کہ اس کی زیادہ سے زیادہ حد سے صرف چند فٹ کم ہے۔ اس صورتحال کے پیش نظر نیشنل ڈیساسٹر مینجمنٹ اتھارٹی کے چیئرمین نے پنجاب ڈیزاسٹر مینجمنٹ اتھارٹی کے ہیڈ کوارٹر کا دورہ کیا اور صوبے میں مون سون کی تیاریوں کا تفصیلی جائزہ لیا۔ اس موقع پر صوبائی وزیر اور پی ڈی ایم اے کے اعلیٰ حکام نے انہیں بریفنگ دی کہ تمام متعلقہ محکمے بشمول ریسکیو 1122 اور ہیلتھ ڈیپارٹمنٹ مکمل طور پر متحرک ہیں۔ اربن فلڈنگ کے خاتمے کے لیے جدید مشینری کا استعمال کیا جا رہا ہے اور وسا کی کارروائیوں کو کئی شہروں تک پھیلا دیا گیا ہے۔ این ڈی ایم اے تمام صوبائی اداروں کے ساتھ قریبی رابطہ رکھے ہوئے ہے تاکہ کسی بھی ناگہانی صورتحال سے موثر طریقے سے نمٹا جا سکے۔