بھارت میں 2028 سے وی ٹو وی کمیونیکیشن والی گاڑیاں متعارف ہوں گی

نئی دہلی: مستقبل قریب میں سڑکوں کا سفر مزید محفوظ اور جدید ہونے جا رہا ہے کیونکہ بھارت میں سال 2028 سے 'بولنے والی کاریں' اور باہم مربوط گاڑیاں سڑکوں پر دوڑتی نظر آئیں گی۔ حکومتی ذرائع کے مطابق ملک بھر میں گاڑیوں کے درمیان باہمی رابطے کے نظام کو بہتر بنانے کے لیے اہم اقدامات کیے جا رہے ہیں تاکہ روڈ سیفٹی کو بلند ترین سطح پر پہنچایا جا سکے۔ اس جدید نظام کے تحت گاڑیاں آپس میں ری ٹائم ڈیٹا کا تبادلہ کریں گی جس میں رفتار، مقام اور سمت جیسی اہم معلومات شامل ہوں گی۔ حکومتی سطح پر یہ تجویز زیر غور ہے کہ اکتوبر 2028 سے بننے والی تمام نئی گاڑیوں کے لیے وی ٹو وی کمیونیکیشن سسٹم کو لازمی قرار دیا جائے۔ ماہرین کا کہنا ہے کہ یہ ٹیکنالوجی ڈرائیونگ کے روایتی انداز کو یکسر بدل کر رکھ دے گی اور سڑکوں پر ہونے والے حادثات میں نمایاں کمی واقع ہوگی۔ اس سسٹم کا بنیادی مقصد ڈرائیورز کو کسی بھی ہنگامی صورتحال، رکاوٹ یا خطرے سے پہلے ہی آگاہ کرنا ہے تاکہ بروقت اقدامات کیے جا سکیں۔ جب ایک گاڑی دوسری گاڑی کے ساتھ اپنے سگنلز شیئر کرے گی تو ٹریفک کے بہاؤ میں بھی بہتری آئے گی اور اندھے موڑ یا دھند جیسے حالات میں بھی گاڑیوں کے درمیان تصادم کا خطرہ کم ہو جائے گا۔ حکومت کی جانب سے اس منصوبے پر تیزی سے کام جاری ہے اور آٹوموبائل انڈسٹری کو بھی اس کی تیاری کے لیے ہدایات دی جا رہی ہیں۔ آنے والے برسوں میں یہ ٹیکنالوجی نہ صرف بھارتی ٹرانسپورٹ کے نظام کو جدید خطوط پر استوار کرے گی بلکہ عالمی معیار کے مطابق سڑکوں کو دنیا کا محفوظ ترین مقام بنانے میں بھی اہم کردار ادا کرے گی۔