اسحاق ڈار کا دورہ اردن، مقبوضہ بیت المقدس کی صورتحال پر اہم وزارتی اجلاس میں شرکت

نائب وزیراعظم اور وزیر خارجہ اسحاق ڈار مقبوضہ بیت المقدس کی بگڑتی ہوئی صورتحال پر ایک مشترکہ اور متفقہ لائحہ عمل مرتب کرنے کے لیے منعقدہ ایک روزہ وزارتی اجلاس میں شرکت کے لیے منگل کے روز اردن کے دارالحکومت عمان روانہ ہو گئے۔ وزارتِ خارجہ (ایف او) کے مطابق، اس دورے کا بنیادی مقصد فلسطینی عوام اور ان کے منصفانہ کاز کے لیے پاکستان کی غیر متزلزل حمایت کا بھرپور اعادہ کرنا ہے۔ یہ اہم اجلاس بدھ کے روز منعقد ہونا طے ہے، جس میں عرب لیگ کے رکن ممالک اور متعدد اسلامی ملکوں کے وزرائے خارجہ شرکت کر رہے ہیں۔ یہ اجلاس اردن کے نائب وزیراعظم اور وزیر الخارجہ ایمن الصفدی کی دعوت پر بلایا گیا ہے، جو خطے کی کشیدہ ہوتی ہوئی صورتحال پر تفصیلی غور کرے گا۔ وزارتِ خارجہ کے بیان کے مطابق، دورے کے دوران تمام شریک وزرائے خارجہ اردن کے شاہ عبداللہ دوم بن الحسین سے بھی ملاقات کریں گے۔ اجلاس کی سائیڈ لائنز پر اسحاق ڈار کی مختلف ہم منصب وزرا کے ساتھ دو طرفہ ملاقاتیں بھی متوقع ہیں، جن میں خطے کی حالیہ تبدیلیوں اور فلسطین بالخصوص غزہ اور مقبوضہ بیت المقدس میں انسانی بحران پر تبادلہ خیال کیا جائے گا۔ ترجمان دفتر خارجہ کا کہنا ہے کہ وزیر خارجہ کی اس اجلاس میں شرکت اس بات کا منہ بولتا ثبوت ہے کہ پاکستان فلسطینی عوام کی منصفانہ جدوجہد کی اصولی حمایت کرتا ہے اور 1967ء سے پہلے کی سرحدوں پر مبنی، ایک آزاد، خودمختار اور متصل فلسطینی ریاست کے قیام کا زبردست حامی ہے جس کا دارالحکومت القس الشریف ہو۔ پاکستان اور دیگر مسلم ممالک نے مشرقی یروشلم میں واقع مسجد اقصی کے احاطے میں انتہا پسند اسرائیلی آباد کاروں کے مسلسل اور اشتعال انگیز حملوں کی شدید الفاظ میں مذمت کی ہے۔ واضح رہے کہ مسجد اقصی مسلمانوں کا تیسرا مقدس ترین مقام ہے جس پر اسرائیل نے 1967ء میں قبضہ کر کے بعد میں اسے یکطرفہ طور پر الحاق کر لیا تھا۔ مسجد اقصی کا احاطہ فلسطینی شناخت کی علامت ہونے کے ساتھ ساتھ ایک انتہائی حساس فلیش پوائنٹ بھی ہے۔ طویل عرصے سے طے شدہ انتظامات کے تحت یہوڈی زائرین اس احاطے کا دورہ تو کر سکتے ہیں لیکن انہیں وہاں عبادت کرنے کی قطعی اجازت نہیں ہے۔ تاہم، فلسطینیوں کو یہ گہرے خدشات لاحق ہیں کہ اس تاریخی حیثیت کو آہستہ آہستہ نقصان پہنچایا جا رہا ہے اور اسرائیل اس میں تبدیلیاں لانا چاہتا ہے۔ اس سے قبل جون کے مہینے میں پاکستان سمیت نو مسلم ممالک کے وزرائے خارجہ نے مقبوضہ بیت المقدس اور اس کے تاریخی و اسلامی اور مسیحی مقدس مقامات کی قانونی اور تاریخی حیثیت کو تبدیل کرنے کی ہر کوشش کو یکسر مسترد کر دیا تھا اور خبردار کیا تھا کہ ایسے اقدام خطے کے امن کو مزید تباہ کر سکتے ہیں۔