گواتیمالا میں فیگو آتش فشاں کا دھماکہ، اورنج الرٹ جاری اور انخلا شروع

گواتیمالا کے مشہور اور فعال ترین آتش فشاں فیگو میں پیر کے روز ایک بار پھر شدید دھماکہ ہوا ہے جس کے بعد ارضیاتی ماہرین اور مقامی انتظامیہ کی جانب سے فوری طور پر ہنگامی اقدامات شروع کر دیے گئے ہیں۔ حکام نے خطرے کے پیش نظر متاثرہ اور گردونواح کے علاقوں کے لیے اورنج الرٹ جاری کرتے ہوئے وہاں کے مکینوں کو محفوظ مقامات پر منتقل کرنے کا حکم دے دیا ہے۔ امدادی ٹیمیں اور متعلقہ ادارے کسی بھی ناگوار صورتحال سے نمٹنے کے لیے مکمل طور پر تیار ہیں۔ یہ ہنگامی اقدامات اس مقام کے قریب کیے جا رہے ہیں جو کہ 2018 کے انتہائی ہلاکت خیز اور تباہ کن آتش فشاں کے دھماکے کا مرکز رہا تھا، جس کی وجہ سے انتظامیہ کوئی بھی خطرہ مول لینے سے گریزاں ہے۔ فیگو آتش فشاں سے اٹھنے والے دھوئیں کے بادل اور راکھ کی موٹی تہیں فضا میں دوں دور تک پھیل گئی ہیں جبکہ لاوا بھی پہاڑی ڈھلوانوں کی جانب بہنا شروع ہو چکا ہے۔ ماہرین ارضیات کے مطابق اس آتش فشاں کی سرگرمیوں میں حالیہ دنوں میں اضافہ دیکھا گیا تھا جس کے بعد پیر کے روز یہ دھماکہ ہوا۔ مقامی انتظامیہ نے شہریوں کو ہدایت کی ہے کہ وہ غیر ضروری سفر سے گریز کریں اور حکومتی احکامات کی روشنی میں فوری طور پر محفوظ مقامات کی طرف ہجرت کریں۔ سکیورٹی فورسز اور سول ڈیپارٹمنٹ کے اہلکار انخلا کے عمل کو مانیٹر کر رہے ہیں تاکہ کسی بھی جانی نقصان سے بچا جا سکے۔ حکومت کی جانب سے جاری کردہ بیان میں کہا گیا ہے کہ متاثرہ خاندانوں کے لیے عارضی پناہ گاہیں قائم کر دی گئی ہیں جہاں انہیں خوراک، طبی امداد اور دیگر ضروری سہولیات فراہم کی جا رہی ہیں۔ بین الاقوامی خبر رساں اداروں کے مطابق گواتیمالا دنیا کے ان خطوط میں شامل ہے جہاں آتش فشاں کی سرگرمیاں معمول کا حصہ ہیں لیکن فیگو کی حالیہ شدت نے حکام کو شدید تشویش میں مبتلا کر دیا ہے۔ ایمرجنسی سروسز کے اہلکار مسلسل صورتحال کا جائزہ لے رہے ہیں اور آنے والے گھنٹوں میں حالات کے مزید خراب ہونے کے خدشے کے پیش نظر الرٹ کی سطح میں مزید اضافہ بھی کیا جا سکتا ہے۔