اسحاق ڈار اور اردنی وزیر خارجہ کی ملاقات، مقبوضہ مغربی کنارے پر تبادلہ خیال

نائب وزیر اعظم اور وزیر خارجہ سینیٹر اسحاق ڈار نے بدھ کے روز اردن کے دارالحکومت عمان میں اپنے ہم منصب ایمن الصفدی سے ملاقات کی، جس میں مقبوضہ مغربی کنارے کی سنگین اور بگڑتی ہوئی صورتحال پر گہری تشویش کا اظہار کیا گیا۔ دفتر خارجہ کے مطابق یہ اہم ملاقات مقبوضہ بیت المقدس کی صورتحال پر ایک مشترکہ لائحہ عمل تیار کرنے کے لیے بلائی گئی وزراء کی سطح کی میٹنگ کے سائیڈ لائنز پر ہوئی۔ اس موقع پر دونوں رہنماؤں نے خطے کی تازہ ترین صورتحال بالخصوص فلسطینی عوام کو درپیش مشکلات پر تفصیلی تبادلہ خیال کیا۔ اسحاق ڈار نے یروشلم میں اسلامی اور مسیحی مقدس مقامات کے تحفظ کے لیے اردن کے کردار کو سراہا اور فلسطینی کاز کے لیے اردنی حکومت کی حمایت کو سراہا۔ ملاقات کے دوران پاکستان اور اردن کے درمیان دوطرفہ تعلقات میں بڑھتی ہوئی رفتار کا خیرمقدم کیا گیا اور سیاسی، دفاعی، اقتصادی، تعلیمی، ثقافتی اور عوامی سطح پر رابطوں کو مزید مستحکم کرنے کے عزم کا اعادہ کیا گیا۔ اس کے علاوہ، دونوں وزراء خارجہ نے خطے کے مجموعی حالات، بشمول امریکہ اور ایران کے درمیان تنازع کے حالیہ پس منظر پر بھی گفتگو کی۔ انہوں نے کشیدگی کو کم کرنے کے لیے بات چیت اور سفارت کاری کی اہمیت پر زور دیا اور اقوام متحدہ اور او آئی سی سمیت کثیر الفریقی فورمز پر امن و استحکام کے فروغ کے لیے قریبی رابطہ کاری جاری رکھنے پر اتفاق کیا۔ ایک الگ ملاقات میں نائب وزیر اعظم اسحاق ڈار نے صومالیہ کے وزیر برائے امور خارجہ اور بین الاقوامی تعاون عبدالسلام عبدی علی سے بھی دوطرفہ ملاقات کی۔ صومالیہ کے وزیر کے ساتھ ملاقات میں دونوں برادر ممالک کے درمیان طویل مدتی تاریخی تعلقات کا جائزہ لیا گیا اور سیاسی، اقتصادی، دفاعی، تعلیم اور صلاحیت سازی کے شعبوں میں تعاون کو مزید وسعت دینے کے طریقوں پر غور کیا گیا۔ دفتر خارجہ کا کہنا ہے کہ اسحاق ڈار کا اردن کا یہ دورہ فلسطینی عوام کے لیے پاکستان کی اصولی حمایت اور قبل از 1967 کی سرحدوں کے حامل آزاد، خودمختار اور متصل فلسطینی ریاست کے قیام کے دیرینہ عزم کا واضح مظہر ہے جس کا دارالحکومت القدس الشریف ہو۔