آبنائے ہرمز کا معاہدہ: ایران اور عمان میں بات چیت آخری مراحل میں

تہران: ایرانی حکام نے بین الاقوامی میڈیا سے گفتگو کرتے ہوئے انکشاف کیا ہے کہ سلطنتِ عمان کے ساتھ آبنائے ہرمز کو مکمل طور پر دوبارہ کھولنے کے حوالے سے طے پانے والا معاہدہ اب اپنے آخری اور فیصلہ کن مراحل میں داخل ہو چکا ہے۔ اس ممکنہ معاہدے کو خطے میں جاری کشیدگی کو کم کرنے کی جانب ایک اہم قدم قرار دیا جا رہا ہے، جس سے نہ صرف سمندری نقل و حمل بحال ہوگی بلکہ عالمی سطح پر توانائی کی سپلائی لائنز کو بھی بڑا ریلیف ملے گا۔ ذرائع کے مطابق اس معاہدے کے تحت ایران کو آبنائے ہرمز میں آنے والے جہازوں کا کنٹرول اور جانے والے جہازوں کی نگرانی کے امور میں اہم کردار حاصل ہوگا۔ اس پیش رفت کے بعد عالمی سطح پر سفارتی حلقوں میں بھی ہلچل تیز ہو گئی ہے جبکہ مشرق وسطیٰ کے موجودہ بحران کے تناظر میں اسے ایک بڑی سفارتی کامیابی کے طور پر دیکھا جا رہا ہے۔ بین الاقوامی توانائی کے ماہرین کا ماننا ہے کہ اس آبی گزرگاہ کے دوبارہ کھلنے سے تیل کی قیمتوں میں استحکام آئے گا۔ دوسری جانب اس خبر کے منظر عام پر آتے ہی امریکی مالیاتی منڈیوں میں بھی زبردست جوش و خروش دیکھا گیا۔ وال اسٹریٹ پر امریکی اسٹاکس میں نمایاں اچھال ریکارڈ کیا گیا، اور سرمایہ کاروں نے اس خبر کا خیرمقدم کیا۔ معاشی ماہرین کا کہنا ہے کہ ایرانی ڈیل کے چند دنوں میں طے پانے کے بیانات نے عالمی اقتصادی مارکیٹوں میں پھیلی ہوئی بے یقینی کے بادلوں کو کافی حد تک چھانٹ دیا ہے۔