پی ایم ڈی سی نے ایم ڈی کیٹ امتحان کی نئی تاریخ کا اعلان کر دیا

پاکستان میڈیکل اینڈ ڈینٹل کونسل (پی ایم ڈی سی) نے جمعرات کے روز اعلان کیا ہے کہ میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ)، جو کہ پہلے 16 اگست کو منعقد ہونا تھا، اب 20 ستمبر کو لیا جائے گا۔ کونسل کی جانب سے جاری کردہ ایک پریس ریلیز میں بتایا گیا ہے کہ وزیراعظم پاکستان کی ہدایت پر تمام امیدواروں، والدین، تعلیمی اداروں اور دیگر اسٹیک ہولڈرز کو مطلع کیا جاتا ہے کہ امتحان کی تاریخ میں تبدیلی کر دی گئی ہے۔ اس فیصلے کا مقصد امتحان کے انعقاد کو زیادہ منصفانہ، محفوظ اور شفاف بنانا ہے تاکہ تمام امیدواروں کو بھرپور سہولت فراہم کی جا سکے۔ اعلیٰ حکام کے مطابق امتحان کی تمام دیگر شرائط، ضوابط اور انتظامات پہلے کی طرح ہی رہیں گے جب تک کہ کوئی نیا نوٹیفیکیشن جاری نہ کیا جائے۔ کونسل نے امیدواروں کو ہدایت کی ہے کہ وہ مزید تازہ ترین معلومات اور ہدایات کے لیے باقاعدگی سے پی ایم ڈی سی کی آفیشل ویب سائٹ اور سرکاری مواصلاتی ذرائع کا وزٹ کرتے رہیں۔ پی ایم ڈی سی نے اس تبدیلی سے طلباء کو ہونے والی کسی بھی زحمت پر افسوس کا اظہار کیا ہے اور تمام متعلقہ فریقین کے تعاون اور سمجھ بوجھ کو سراہا ہے۔ واضح رہے کہ پاکستان بھر کے میڈیکل اور ڈینٹل کالجوں میں داخلے کے لیے ایم ڈی کیٹ پاس کرنا لازمی قرار دیا گیا ہے۔ ہر سال ملک بھر سے تقریباً دو لاکھ امیدوار اس امتحان میں حصہ لیتے ہیں جن میں سے لگ بھگ پچیس ہزار طلباء پبلک اور پرائیویٹ سیکٹر کے میڈیکل اور ڈینٹل کالجوں میں داخلہ حاصل کرنے میں کامیاب ہوتے ہیں۔ اس سے قبل رواں ہفتے آزاد جموں و کشمیر کے ہیلتھ سیکرٹری نے پی ایم ڈی سی حکام سے ملاقات کی تھی اور علاقے میں طویل انٹرنیٹ شٹ ڈاؤن کی وجہ سے طلباء کو رجسٹریشن میں درپیش مشکلات کا معاملہ اٹھایا تھا، جس پر پی ایم ڈی سی حکام نے مکمل تعاون کی یقین دہانی کرائی تھی۔ علاوہ ازیں، سینیٹ کی قائمہ کمیٹی برائے صحت کے ذیلی اجلاس میں بھی امیدواروں کی جانب سے موصول ہونے والی شکایات پر غور کیا گیا تھا۔