بلوچستان میں سکیورٹی فورسز کے آپریشن، 12 بھارتی حمایت یافتہ دہشت گرد ہلاک

راولپنڈی: پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے بلوچستان میں دو الگ الگ انٹیلی جنس بیسڈ آپریشنز (آئی بی اوز) کے دوران بھارت کے حمایت یافتہ مجموعی طور پر 12 دہشت گردوں کو ہلاک کر دیا ہے۔ ان کارروائیوں سے ملک دشمن عناصر کے ناپاک عزائم کو ایک بار پھر خاک میں ملا دیا گیا ہے۔ پہلا آپریشن ضلع واشک میں کیا گیا جہاں انٹیلی جنس اطلاعات کی بنیاد پر سکیورٹی فورسز نے دہشت گردوں کے ٹھکانے کو نشانہ بنایا۔ شدید فائرنگ کے تبادلے کے بعد سکیورٹی فورسز نے موثر کارروائی کرتے ہوئے 6 دہشت گردوں کو ہلاک کر دیا۔ اس آپریشن کے دوران دہشت گردوں کے پاس موجود بھاری مقدار میں اسلحہ اور گولہ بارود بھی برآمد کر لیا گیا ہے۔ دوسری کارروائی ضلع مستونگ میں عمل میں لائی گئی جہاں سکیورٹی فورسز اور دہشت گردوں کے درمیان گھمسان کا مقابلہ ہوا۔ اس فائرنگ کے تبادلے میں مزید 6 دہشت گرد جہنم واصل کر دیے گئے۔ حکام کے مطابق یہ تمام دہشت گرد ریاست مخالف سرگرمیوں اور تخریب کاری کے مختلف واقعات میں ملوث تھے اور انہیں بھارتی پراکسی فتنہ الحندوستان کی جانب سے مکمل حمایت حاصل تھی۔ سکیورٹی ذرائع کا کہنا ہے کہ بلوچستان میں امن و امان کی صورتحال کو خراب کرنے اور ترقیاتی منصوبوں کو سبوتاژ کرنے والی ہر سازش کو آہنی ہاتھوں سے نمٹا جائے گا۔ پاک فوج، رینجرز اور قانون نافذ کرنے والے دیگر ادارے ملک سے دہشت گردی کے ناسور کو جڑ سے اکھاڑ پھینکنے کے لیے پرعزم ہیں اور ملک بھر میں انٹیلی جنس بیسڈ آپریشنز بلا تعطل جاری رہیں گے۔