دفترِ خارجہ کی بھارتی وزیرِ دفاع کے کشمیر سے متعلق بیانات پر سخت مذمت

اسلام آباد: دفترِ خارجہ (ایف او) نے بھارتی وزیرِ دفاع راجناتھ سنگھ کے جموں و کشمیر کے تنازعے سے متعلق انتہائی اشتعال انگیز اور غیر ذمہ دارانہ ریمارکس کی شدید ترین الفاظ میں مذمت کی ہے۔ ترجمان دفترِ خارجہ کی جانب سے جاری کردہ بیان میں کہا گیا ہے کہ پڑوسی ملک کو پاکستان کے عزم کو ہرگز کم نہیں سمجھنا چاہیے اور کسی بھی بھارتی جارحیت کو ناکام بنانے کے لیے پوری قوم اور مسلح افواج مکمل طور پر تیار ہیں۔ یہ ردعمل بھارتی وزیرِ دفاع کے اس بیان کے بعد سامنے آیا جس میں انہوں نے دعویٰ کیا تھا کہ پاکستان کے ساتھ کوئی مذاکرات نہیں ہوں گے اور اگر ہوئے تو وہ صرف آزاد جموں و کشمیر کے معاملے پر ہوں گے۔ دفترِ خارجہ کے بیان میں مزید کہا گیا ہے کہ بھارتی وزیر کا بیان اقوام متحدہ کی سلامتی کونسل کے ایجنڈے پر موجود بین الاقوامی سطح پر تسلیم شدہ تنازعہ کشمیر کے حقائق کو مسخ کرنے کے مترادف ہے۔ یہ بیان اس بات کا بھی ثبوت ہے کہ بھارتی حکومت علاقائی اور بین الاقوامی امن و سلامتی کو خطرے میں ڈالنے کی دانستہ پالیسی پر عمل پیرا ہے۔ ایسے بیانات کا مقصد بھارت کے غیر قانونی زیرِ تسلط جموں و کشمیر میں جاری مظالم، اس کی ریاستی دہشت گردی اور ملک کے اندرونی سیاسی بحران سے عالمی توجہ ہٹانا ہے۔ پاکستان نے عالمی برادری بالخصوص اقوام متحدہ پر زور دیا ہے کہ وہ بھارت کے ہٹ دھرم رویے کا نوٹس لے اور اسے اقوام متحدہ کی سلامتی کونسل کی قراردادوں کے مطابق کشمیری عوام کو حقِ خود ارادیت دلانے کا پابند بنائے۔ دریں اثنا، وزیرِ دفاع خواجہ آصف نے بھی بھارتی قیادت کے بیانات پر کڑے ردعمل کا اظہار کرتے ہوئے کہا ہے کہ زبردستی کی بیان بازی کے ذریعے بین الاقوامی سطح پر تسلیم شدہ قانونی حقائق کو تبدیل نہیں کیا جا سکتا۔ سوشل میڈیا پر اپنے ایک بیان میں خواجہ آصف نے کہا کہ ایسے بیانات نہ تو مقبوضہ کشمیر کی متنازع حیثیت کو بدل سکتے ہیں اور نہ ہی خطے میں امن اور معنی خیز مذاکرات کے لیے سازگار ہیں۔ انہوں نے اس بات پر زور دیا کہ بھارت خود جنوبی ایشیا میں دہشت گردی کا سب سے بڑاپرورده اور عدم استحکام کی جڑ ہے، جو خطے کے امن کو اپنے جارحانہ عزائم کی بھینٹ چڑھا رہا ہے۔ وزیرِ دفاع نے واضح کیا کہ پاکستان خطے میں امن اور مذاکرات کا خواہاں ہے لیکن اپنی خودمختاری، سالمیت اور قومی سلامتی کا دفاع کرنے کا عزم آہنی ہے جس کا کبھی غلط امتحان نہیں لیا جانا چاہیے۔ انہوں نے مزید کہا کہ بھارتی قیادت کا اس قسم کا پرتشدد اور اشتعال انگیز لہجہ مودی حکومت کی داخلی ناکامیوں اور اندرونی عدم استحکام سے توجہ ہٹانے کی ایک ناکام کوشش ہے۔ پاکستان نے ہر فورم پر ثابت کیا ہے کہ وہ اپنی سرحدوں کے دفاع کی مکمل صلاحیت رکھتا ہے اور کسی بھی غلط اقدام کا منہ توڑ جواب دیا جائے گا۔