جماعت اسلامی کا مہنگائی کے خلاف احتجاج اور شاہراہیں بند

جماعت اسلامی کی کال پر ملک کے مختلف شہروں میں مہنگائی، بے روزگاری اور فیول کی قیمتوں میں ظالمانہ اضافے کے خلاف بڑے پیمانے پر احتجاجی مظاہرے کیے گئے۔ اسلام آباد، راولپنڈی، کراچی اور ملتان سمیت متعدد شہروں میں جماعت اسلامی کے کارکنان بڑی تعداد میں سڑکوں پر نکل آئے اور حکومت کے خلاف شدید نعرے بازی کی۔ اس احتجاج کے باعث ملک کی اہم شاہراؤں اور رابطہ سڑکوں پر ٹریفک کا نظام درہم برہم ہو گیا۔ راولپنڈی اور اسلام آباد میں ہونے والے مظاہروں کی قیادت مرکزی رہنماؤں نے کی، جبکہ لیاقت بلوچ نے اسلام آباد میں مہنگائی کے خلاف ہونے والے مارچ کی بھرپور قیادت کی۔مظاہرین کا کہنا تھا کہ موجودہ حکومتی پالیسیوں کی وجہ سے غریب عوام کا جینا محال ہو چکا ہے اور روزمرہ کی اشیائے ضروریہ کے ساتھ ساتھ پیٹرولیم مصنوعات کی قیمتوں میں مسلسل اضافے نے عام آدمی کی کمر توڑ دی ہے۔ کارکنان نے پلے کارڈز اٹھا رکھے تھے جن پر مہنگائی کے خلاف اور فوری ریلیف فراہم کرنے کے مطالبات درج تھے۔ احتجاجی دھرنوں اور ریلیوں کے باعث ہائی ویز پر طویل ٹریفک قطاریں لگ گئیں، جس سے مسافروں اور روزانہ کی بنیاد پر سفر کرنے والے شہریوں کو شدید مشکلات کا سامنا کرنا پڑا۔انتظامیہ کی جانب سے ٹریفک کی روانی کو بحال کرنے کے لیے متبادل راستے فراہم کرنے کی کوششیں کی گئیں، لیکن شہر کے مختلف حصوں میں دباؤ برقرار رہا۔ جماعت اسلامی کے قائدین نے اپنے خطابات میں واضح کیا کہ اگر حکومت نے عوام دشمن پالیسیوں اور مہنگائی کے جن کو قابو میں نہ لایا گیا تو احتجاجی تحریک کا دائرہ کار پورے ملک تک پھیلا دیا جائے گا۔ انہوں نے حکومت سے مطالبہ کیا کہ فیول کی قیمتوں میں فوری طور پر کمی کی جائے اور عوام کو ریلیف فراہم کیا جائے۔