کراچی میں ایدھی ہوم پر بڑی ڈکیتی، عملے کی تنخواہوں کے ساڑھے 6 لاکھ روپے لوٹ لیے گئے

کراچی کے علاقے سہراب گوٹھ میں قائم ایدھی فاؤنڈیشن کے شیلٹر ہوم میں پیش آنے والے ایک افسوسناک واقعے میں چار مسلح ملزمان نے عملے کو اسلحے کے زور پر یرغمال بنایا اور لاکھوں روپے کی نقدی لوٹ کر فرار ہو گئے۔ پولیس اور فاؤنڈیشن کے ذرائع کے مطابق یہ واردات جمعہ کے روز پیش آئی جس نے فلاحی اداروں کی سیکیورٹی پر کئی سوالیہ نشان کھڑے کر دیے ہیں۔ ایدھی فاؤنڈیشن کے ترجمان نے میڈیا کو تفصیلات سے آگاہ کرتے ہوئے بتایا کہ اس شیلٹر ہوم میں ییتیم اور بے سہارا بچے رہائش پذیر ہیں جبکہ وہاں ڈھائی سے تین سو کے قریب ملازمین اپنی ڈیوٹیاں سر انجام دیتے ہیں۔ ترجمان کے مطابق فلاحی ادارے کے ملازمین بینک سے ساڑھے چھ ملین روپے کی نقدی نکلا کر لائے تھے جسے شیلٹر ہوم کے عملے میں ماہانہ تنخواہوں کی مد میں تقسیم کیا جانا تھا۔ ابتدائی اطلاعات کے مطابق نامعلوم ملزمان مبینہ طور پر بینک سے ہی رقم لانے والے افراد کا تعاقب کرتے ہوئے شیلٹر ہوم کے احاطے میں داخل ہوئے اور موقع کا فائدہ اٹھاتے ہوئے تمام نقدی زبردستی چھین کر فرار ہو گئے۔ واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کی ناکہ بندی کر کے شوا اکٹھے کرنے کا عمل شروع کر دیا گیا۔ پولیس حکام کا کہنا ہے کہ سی سی ٹی وی فوٹیجز اور دیگر تکنیکی ذرائع کی مدد سے ملزمان کی تلاش جاری ہے اور جلد انہیں قانون کے کٹہرے میں لایا جائے گا۔ دوسری جانب، وزیراعلیٰ سندھ مراد علی شاہ نے ایدھی شیلٹر ہوم میں ڈکیتی کے اس دلخراش واقعے کا سخت نوٹس لیا ہے۔ انہوں نے اپنے ایک بیان میں کہا کہ ایدھی فاؤنڈیشن غریب اور لاوارث لوگوں کی مدد کا سب سے بڑا ذریعہ ہے اور اس طرح کے فلاحی مرکز میں ڈکیتی ناقابل برداشت جرم ہے۔ وزیراعلیٰ نے متعلقہ حکام کو ہدایت کی ہے کہ تمام وسائل بروئے کار لاتے ہوئے مجرمان کو فوری طور پر گرفتار کیا جائے اور مسروقہ رقم کی بازیابی یقینی بنائی جائے۔