ہنگو انٹیلی جنس بیسڈ آپریشن: کیپٹن شہید اور 7 دہشت گرد ہلاک

راولپنڈی: پاک فوج کے شعبہ تعلقات عامہ (آئی ایس پی آر) کے مطابق خیبر پختونخوا کے ضلع ہنگو میں سیکیورٹی فورسز نے ایک کامیاب انٹیلی جنس بیسڈ آپریشن کیا ہے جس کے دوران شدید فائرنگ کے تبادلے میں ایک کیپٹن جام شہادت نوش کر گئے جبکہ 7 دہشت گردوں کو بھی جہنم واصل کر دیا گیا۔ سیکیورٹی فورسز کی اس کارروائی کو ملک سے دہشت گردی کے مکمل خاتمے کی جانب ایک اور اہم قدم قرار دیا جا رہا ہے۔ آئی ایس پی آر کی جانب سے جاری کردہ تفصیلات کے مطابق یہ آپریشن خفیہ اطلاعات کی بنیاد پر کیا گیا تھا تاکہ علاقے میں موجودہ عناصر کے ناپاک عزائم کو خاک میں ملایا جا سکے۔ کارروائی کے دوران دہشت گردوں نے سیکیورٹی فورسز پر شدید فائرنگ کی جس کا بھرپور اور مؤثر جواب دیا گیا، جس کے نتیجے میں 7 دہشت گرد ہلاک ہو گئے۔ اس دوران ملک کی خاطر جان کا نذرانہ پیش کرنے والے کیپٹن نے بہادری کی تاریخ رقم کی۔ دوسری جانب، صدر مملکت آصف علی زرداری نے ہنگو میں جام شہادت نوش کرنے والے کیپٹن حمزہ اکرم شہید کو زبردست خراج عقیدت پیش کیا ہے۔ انہوں نے شہید کے بلند درجات کے لیے دعا اور لواحقین سے تعزیت کا اظہار کرتے ہوئے کہا کہ پاک فوج کے جوانوں کی قربرانیوں کی بدولت ملک میں امن قائم ہے اور پوری قوم اپنے شہداء کی قربانیوں کو کبھی فراموش نہیں کرے گی۔ واضح رہے کہ سیکیورٹی فورسز کی جانب سے ملک بھر میں دہشت گردوں کے خلاف آپریشنز کا سلسلہ تیزی سے جاری ہے۔ اس سے قبل خیبر پختونخوا اور بلوچستان کے مختلف اضلاع میں بھی سیکیورٹی فورسز نے کامیاب کارروائیاں کرتے ہوئے درجنوں دہشت گردوں کو ہلاک کیا ہے۔ حکومت اور عسکری قیادت کا عزم ہے کہ ملک سے دہشت گردی کے ناسور کو جڑ سے اکھڑ پھینکا جائے گا اور اس مقصد کے لیے تمام دستیاب وسائل بروئے کار لائے جا رہے ہیں۔