جاپان میں ہیٹ اسٹروک سے فیجی کے رگبی کھلاڑی کی ہلاکت

ٹوکیو: جاپان میں شدید گرمی کی لہر اور درجہ حرارت 35 ڈگری سینٹی گریڈ تک پہنچنے کے باعث ایک دردناک واقعہ پیش آیا ہے جہاں فیجی سے تعلق رکھنے والے رگبی کے نوجوان کھلاڑی ہیٹ اسٹروک کے باعث جاں بحق ہو گئے۔ اس افسوسناک واقعے نے کھیلوں کی دنیا اور کھلاڑیوں کی صحت سے متعلق حفاظتی اقدامات پر ایک بار پھر گہرے سوالات اٹھا دیے ہیں۔ غیر ملکی خبر رساں اداروں کے مطابق متوفی کھلاڑی کی شناخت سائی مونی وونیلاگی کے طور پر ہوئی ہے جو جاپان میں مقیم تھے اور اپنی ٹیم کے ساتھ باقاعدگی سے ٹریننگ میں حصہ لے رہے تھے۔ رپورٹس کے مطابق پیر کے روز جب ٹیم کا تربیتی سیشن جاری تھا تو ملک میں شدید گرمی اور حبس کا راج تھا۔ درجہ حرارت میں نمایاں اضافے کی وجہ سے سائی مونی وونیلاگی کو ٹریننگ کے دوران ہی طبیعت میں خرابی محسوس ہوئی اور ان میں ہیٹ اسٹروک کی واضح علامات ظاہر ہوئیں۔ انہیں فوری طور پر طبی امداد کے لیے قریبی اسپتال منتقل کیا گیا جہاں ڈاکٹروں نے ان کی حالت کو نازک قرار دیتے ہوئے انہیں انتہائی نگداشت کے وارڈ میں رکھا۔ وہ کئی روز تک زندگی اور موت کی جنگ لڑتے رہے لیکن جمعہ کے روز وہ زخموں کی تاب نہ لاتے ہوئے دار فانی سے کوچ کر گئے۔ اس المناک واقعے کے بعد رگبی کی مقامی کمیونٹی اور شائقینِ کھیل میں شدید سوگ کی فضا چھائی ہوئی ہے۔ کھیلوں کے ماہرین اور طبی ماہرین کا کہنا ہے کہ حالیہ برسوں میں دنیا بھر میں بڑھتا ہوا درجہ حرارت کھلاڑیوں کے لیے بالخصوص آؤٹ ڈور کھیلوں میں شدید خطرات کا باعث بن رہا ہے۔ گرمیوں کے شدید موسم میں کھلاڑیوں کی جسمانی صحت اور ڈی ہائیڈریشن کو روکنے کے لیے مزید سخت حفاظتی پروٹوکولز کی ضرورت ہے تاکہ اس طرح کے قیمتی انسانی جانوں کے نقصان کو مستقبل میں روکا جا سکے۔