سندھ میں 29 جولائی کو عام تعطیل، شاہ عبداللطیف بھٹائی کا عرس

کراچی: سندھ حکومت نے صوفی ازم کے عظیم شاعر اور بزرگ حضرت شاہ عبداللطیف بھٹائی کے سالانہ عرس کی تقریبات کے سلسلے میں صوبے بھر میں عام تعطیل کا اعلان کیا ہے۔ حکومت کی جانب سے جاری کردہ فیصلے کے مطابق 29 جولائی کو سندھ بھر میں تمام سرکاری دفاتر، نیم سرکاری ادارے، تعلیمی ادارے اور کارپوریشنز بند رہیں گے۔ اس سالانہ عرس میں شرکت کے لیے ملک بھر سے عقیدت مندوں کی بڑی تعداد درگاہ بھٹ شاہ کا رخ کرتی ہے، جہاں وہ صوفی بزرگ کو خراج عقیدت پیش کرتے ہیں۔ عرس کے دنوں میں درگاہ کے احاطے میں خصوصی محافلِ سماع، ادبی کانفرنسیں اور صوفیانہ کلام کی نشستیں منعقد کی جاتی ہیں، جن میں نامور صوفی گلوکاروں اور علماء کی طرف سے شاہ لطیف کی شاعری اور فلسفے پر روشنی ڈالی جاتی ہے۔ صوبائی حکومت کے اس اقدام کا مقصد عقیدت مندوں کو اس مذہبی اور ثقافتی تہوار میں بھرپور طریقے سے شرکت کرنے کا موقع فراہم کرنا ہے۔ ضلعی انتظامیہ اور قانون نافذ کرنے والے اداروں کی جانب سے زائرین کی س سیکورٹی اور سہولت کے لیے سخت انتظامات کیے گئے ہیں تاکہ عرس کی تقریبات پُرامن طریقے سے اختتام پذیر ہوں۔ محکمہ داخلہ سندھ کی طرف سے جاری کردہ نوٹیفکیشن تمام متعلقہ محکموں کو ارسال کر دیا گیا ہے جس میں تعطیل کے احکامات پر سختی سے عمل درآمد کی ہدایت کی گئی ہے۔