سمندری طوفان ڈالفن: جاپان کے بعد چین میں الرٹ جاری

طاقتور سمندری طوفان ڈالفن نے جاپان کے جنوبی پریفیکچر اوکیناوا کو اپنی لپیٹ میں لے لیا ہے، جس کے نتیجے میں کم از کم چھ افراد زخمی ہوئے ہیں اور پچاس ہزار سے زائد عمارتوں کی بجلی منقطع ہو گئی ہے۔ حکام کے مطابق اوکیناوا میں تیز ہواؤں کی وجہ سے گرنے والے افراد سمیت پانچ بزرگ معمولی زخمی ہوئے جبکہ ایک اور شخص کاگوشیما پریفیکچر میں زخمی ہوا۔ طوفان کی شدت کا اندازہ اس بات سے لگایا جا سکتا ہے کہ اس میں ہوا کی رفتار 162 کلومیٹر فی گھنٹہ اور جھکڑ 216 کلومیٹر فی گھنٹہ تک ریکارڈ کیے گئے۔ جاپانی ایئر لائنز نے اس صورتحال کے پیش نظر اوکیناوا کے لیے اپنی پروازیں معطل کر دی ہیں۔ جاپان کے بعد اب اس طوفان کا رخ چین کی طرف ہے جہاں اتوار اور پیر کی درمیانی شب اس کے خشکی سے ٹکرانے کی توقع ہے۔ چینی حکام نے طوفان ڈالفن کو اورنج کیٹیگری کا طوفان قرار دیا ہے جو کہ دوسرا سب سے اونچا درجہ ہے۔ سیلاب اور لینڈ سلائیڈنگ کے خطرات کے پیش نظر ہنگامی رسد اور الرٹ کی سطح کو بھی بڑھا دیا گیا ہے۔ چین کے نیشنل میٹرولوجیکل سینٹر کے مطابق طوفان کے ژیجیانگ صوبے کے شہر ژوشان اور فوجیان صوبے کے شہر فوڈنگ کے درمیان ٹکرانے کا قوی امکان ہے۔ چین کے میری ٹائم فورکاسٹنگ سینٹر نے ساحلی پانیوں کے لیے ریڈ وارننگ برقرار رکھی ہے جہاں پانچ سے آٹھ میٹر تک اونچی لہریں اٹھنے کی پیشگوئی کی گئی ہے۔ ژیجیانگ اور شنگھائی سمیت مشرقی چین کے کئی حصوں میں شدید بارشوں اور طوفانی ہواؤں کا سلسلہ جاری رہنے کا امکان ہے۔ اس صورتحال کے پیش نظر چین کی بڑی بندرگاہوں، فیری سروسز اور ہوائی اڈوں پر آپریشنز معطل کر دیے گئے ہیں جبکہ ماہی گیروں کو کشتیوں سمیت واپس ساحل پر آنے کی ہدایت کی گئی ہے۔ ننگبو لیشے انٹرنیشنل ایئرپورٹ نے اتوار کو تمام پروازیں معطل کرنے کا اعلان کیا ہے جبکہ بیجنگ کے حکام بھی صورتحال پر گہری نظر رکھے ہوئے ہیں۔ تائیوان میں بھی طوفان کے باعث بین الاقوامی پروازیں منسوخ کی گئی ہیں اور شمالی حصوں میں شدید بارش کی توقع ظاہر کی گئی ہے۔