ایران کا اعلان: امریکہ کو جنگ کے خاتمے کا فیصلہ کرنے کی اجازت نہیں دیں گے

تہران: ایرانی وزارت خارجہ کے ترجمان نے ایک اہم بیان میں کہا ہے کہ چند خلیجی ممالک اس وقت اس تنازع اور جنگ میں ملوث ہیں، اور تہران کسی بھی صورت میں امریکہ کو یہ طے کرنے کی اجازت نہیں دے گا کہ اس کشیدگی کا خاتمہ کب اور کیسے ہوگا۔ ایرانی حکام کا کہنا ہے کہ امریکہ اس وقت خطے کی صورتحال میں پھنس چکا ہے جبکہ تہران بدستور اسٹریٹجک آبنائے پر کنٹرول برقرار رکھے ہوئے ہے۔ بین الاقوامی میڈیا رپورٹس کے مطابق تہران کی جانب سے یہ بھی واضح کیا گیا ہے کہ فی الحال امریکہ کے ساتھ براہ راست مذاکرات کی کوئی گنجائش یا حالات موجود نہیں ہیں۔ ایرانی ترجمان نے دوٹوک انداز میں کہا کہ جنگ اور امن کے فیصلوں کی باگ ڈور بیرونی طاقتوں بالخصوص امریکہ کے ہاتھ میں نہیں دی جا سکتی، اور ایران اپنے دفاع اور علاقائی خودمختاری کے تحفظ کے لیے تمام ضروری اقدامات جاری رکھے گا۔ انہوں نے مزید کہا کہ اگرچہ امریکہ کے ساتھ بعض پیغامات کا تبادلہ جاری ہے، لیکن موجودہ حالات میں مذاکرات کے لیے کوئی سازگار ماحول یا شرائط موجود نہیں ہیں۔ تہران کے اس تازہ بیان سے خطے میں جاری کشیدگی کے مزید طول پکڑنے کا خدشہ ظاہر کیا جا رہا ہے، جبکہ عالمی برادری کی جانب سے بھی صورتحال پر گہری نظر رکھی جا رہی ہے تاکہ سفارتی سطح پر تنازع کو مزید پھیلنے سے روکا جا سکے۔