بلوچستان میں انٹیلی جنس بیسڈ آپریشن، 15 دہشت گرد ہلاک

راولپنڈی: سکیورٹی فورسز نے بلوچستان میں دہشت گردوں کے خلاف بھرپور کارروائی کرتے ہوئے 15 دہشت گردوں کو ہلاک کر دیا ہے۔ یہ کارروائیاں انٹیلی جنس بیسڈ آپریشنز (IBOs) کے تحت صوبے کے مختلف حصوں میں عمل میں لائی گئیں۔ پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے ملک دشمن عناصر کے ناپاک عزائم کو خاک میں ملاتے ہوئے انتہائی مہارت سے یہ کارروائیاں انجام دیں۔ کارروائی کے دوران دہشت گردوں کے ٹھکانوں کو کامیابی سے نشانہ بنایا گیا، جس کے نتیجے میں 15 خوارجی اور دہشت گرد جہنم واصل ہو گئے۔ ہلاک ہونے والے دہشت گرد سکیورٹی فورسز اور معصوم شہریوں کے خلاف متعدد دہشت گردانہ کارروائیوں میں ملوث تھے۔ کارروائی کے دوران سکیورٹی فورسز نے دہشت گردوں کے قبضے سے بھاری مقدار میں اسلحہ، گولہ بارود اور بارود سے بھری جیکٹس بھی برآمد کر لیں۔ ان مواد کا استعمال صوبے میں بڑے پیمانے پر دہشت گردی پھیلانے کے لیے کیا جانا تھا، لیکن بروقت کارروائی نے ایک بڑا سانحہ ٹال دیا۔ سکیورٹی فورسز اور قانون نافذ کرنے والے اداروں نے واضح کیا ہے کہ بلوچستان میں امن و امان کی بحالی کے لیے ریاست کا عزم غیر متزلزل ہے۔ صوبے میں امن کو سبوتاژ کرنے کی کسی بھی کوشش کو کامیاب نہیں ہونے دیا جائے گا۔ عسکری حکام کا کہنا ہے کہ ملک سے دہشت گردی کے مکمل خاتمے تک یہ آپریشنز بلا تعطل جاری رہیں گے۔ اس کامیاب کارروائی پر عوامی حلقوں اور سول سوسائٹی نے سکیورٹی فورسز کو زبردست خراج تحسین پیش کیا ہے اور ملک کی بقا اور سلامتی کے لیے دی جانے والی قربانیوں کو سراہا ہے۔