اسکاٹ لینڈ میں کوہ پیماؤں کی ریسکیو کارروائیاں، ٹیکنالوجی پر وارننگ

اسکاٹ لینڈ کے مشہور تفریحی اور پہاڑی مقام آئل آف اسکائی میں ریسکیو حکام نے کوہ پیماؤں اور سیاحوں کے لیے ایک اہم انتباہ جاری کیا ہے، جو ایک ہی دن میں پیش آنے والے متعدد ہنگامی حادثات کے بعد سامنے آیا ہے۔ اطلاعات کے مطابق ریسکیو ٹیموں کو ایک ہی دن میں 20 سے زائد کوہ پیماؤں کو مشکل حالات سے بحفاظت نکالنے کے لیے متعدد ریسکیو آپریشنز کرناپڑے، جس نے پہاڑی علاقوں میں حفاظتی انتظامات پر سنجیدہ سوالات اٹھا دیے ہیں۔ اسکائی ماؤنٹین ریسکیو ٹیم (MRT) کی جانب سے جاری کردہ بیان میں کہا گیا ہے کہ آج کے دور میں کوہ پیما اپنے راستے کی تلاش کے لیے مکمل طور پر موبائل فونز اور جی پی ایس جیسی ڈیجیٹل ٹیکنالوجی پر انحصار کرتے ہیں۔ تاہم، خراب موسم، بیٹری ختم ہونے یا سگنل نہ ملنے کی وجہ سے یہ آلات اکثر ناکام ہو جاتے ہیں، جو سیاحوں کے لیے شدید خطرے کا باعث بنتا ہے۔ ٹیم نے زور دیا ہے کہ سیاحوں کے پاس ڈیجیٹل آلات کے ساتھ ساتھ روایتی کاغذی نقشہ (Map) اور کمپاس (Compass) ہونا اور ان کا استعمال آنا انتہائی ضروری ہے۔ ح حکام نے مزید ہدایات جاری کرتے ہوئے کہا ہے کہ کسی بھی پہاڑی سفر پر نکلنے سے پہلے راستے کی مکمل معلومات حاصل کی جائیں اور ہمیشہ ایک متبادل منصوبہ یا 'پلان بی' تیار رکھا جائے۔ اس کے علاوہ، سفر پر روانہ ہونے سے پہلے مقامی موسمی حالات کا جائزہ لینا بھی کامیابی اور سلامتی کی ضمانت ہے۔ ریسکیو اداروں کا کہنا ہے کہ تھوڑی سی احتیاط اور بہتر تیاری سے اس طرح کے حادثات سے بچا جا سکتا ہے اور قیمتی انسانی جانوں کو خطرے میں پڑنے سے بچایا جا سکتا ہے۔