پنجگور میں سیکیورٹی فورسز کا آپریشن، اہم کمانڈر سمیت 5 دہشت گرد ہلاک

سیکیورٹی فورسز نے بلوچستان کے ضلع پنجگور کے علاقوں سرکنی اور چیدگی میں ایک کامیاب انٹیلی جنس بیسڈ کارروائی (آئی بی او) کے دوران ایک اہم کمانڈر سمیت پانچ دہشت گردوں کو جہنم واصل کر دیا ہے۔ ریڈیو پاکستان کی رپورٹ کے مطابق یہ کارروائی بلوچستان میں جاری آپریشن 'رد الفتنہ-3' کے سلسلے کی ایک کڑی ہے، جس کا مقصد صوبے سے دہشت گردی کے ناسور کو جڑ سے اکھاڑ پھینکنا ہے۔ سیکیورٹی ذرائع کا کہنا ہے کہ فورسز نے پنجگور میں دہشت گردوں کی موجودگی کی مصدقہ اطلاع پر یہ چھاپہ مار کارروائی کی، جہاں فائرنگ کے تبادلے میں پانچ دہشت گرد مارے گئے، جن میں ایک انتہائی مطلوب کمانڈر وزیر بھی شامل ہے۔ ہلاک ہونے والے دہشت گردوں کے قبضے سے چار موٹر سائیکلیں، مشین گنز اور بھاری مقدار میں جدید اسلحہ و گولہ بارود برآمد کیا گیا ہے۔ ابتدائی تحقیقات اور رپورٹس کے مطابق یہ عناصر علاقے میں ڈکیتی، بھتہ خوری، اغوا برائے تاوان اور معصوم شہریوں بالخصوص مقامی تاجروں کو نشانہ بنانے کی سنگین وارداتوں میں ملوث تھے۔ وفاقی وزیر داخلہ محسن نقوی نے پنجگور میں کامیاب انٹیلی جنس بیسڈ آپریشن پر سیکیورٹی فورسز کے افسران اور جوانوں کو شاندار الفاظ میں خراج تحسین پیش کیا۔ اپنے بیان میں وزیر داخلہ نے فورسز کی پیشہ ورانہ صلاحیتوں اور جرأت کو سراہتے ہوئے کہا کہ اس بروقت کارروائی نے دہشت گردوں کے ناپاک عزائم کو خاک میں ملا دیا ہے اور خطے میں ان کے نیٹ ورک کو شدید دھچکا پہنچایا ہے۔ انہوں نے اس عزم کا اعادہ کیا کہ بلوچستان سمیت پورے ملک سے دہشت گردی کے مکمل خاتمے تک ریاست اور عوام اپنی سیکیورٹی فورسز کے شانہ بشانہ کھڑے رہیں گے تاکہ ملک میں مستقل امن و استحکام کو یقینی بنایا جا سکے۔ یاد رہے کہ یہ کارروائی ایک ایسے وقت میں سامنے آئی ہے جب صوبے کے مختلف اضلاع میں سیکیورٹی فورسز کی جانب سے دہشت گردوں کے خلاف آپریشنز کا سلسلہ تیزی سے جاری ہے۔ گزشتہ دنوں بھی بلوچستان کے مختلف علاقوں میں کارروائیوں کے دوران بڑی تعداد میں دہشت گردوں کو ہلاک کیا گیا تھا۔ صوبے میں امن و امان کی بحالی کے لیے قانون نافذ کرنے والے ادارے اور سیکیورٹی فورسز پوری عزم اور طاقت کے ساتھ دہشت گرد عناصر کے خلاف برسرپیکار ہیں تاکہ عام شہریوں کے جان و مال کا تحفظ یقینی بنایا جا سکے۔