مغربی یورپ میں گرمی کے ریکارڈ، جون اور جولائی تاریخ کے گرم ترین ماہ

یورپی یونین کے ماحولیاتی نگاداران ادارے کوپرنیکس کلائمتھ چینج سروس نے انکشاف کیا ہے کہ مغربی یورپ میں جون اور جولائی کے مہینے تاریخ کے گرم ترین ماہ کے طور پر ریکارڈ کیے گئے ہیں۔ اس دوران خطے کے بیشتر حصوں میں درجہ حرارت نے پرانے تمام ریکارڈ توڑ دیے جس سے نظام زندگی شدید متاثر ہوا۔ ماہرین کے مطابق گلوبل وارمنگ اور موسمیاتی تبدیلیوں کے اثرات اب نہایت واضح شکل میں سامنے آ رہے ہیں، جن کا خمیازہ عام شہریوں اور معیشت کو اٹھانا پڑ رہا ہے۔ رپورٹ کے مطابق اس شدید گرمی کی لہر کے ساتھ ساتھ تاریخی طور پر کم بارشوں کا سلسلہ بھی جاری رہا، جس نے صورتحال کو مزید تشویشناک بنا دیا۔ پانی کی قلت اور خشک سالی کی وجہ سے زرعی شعبے کو شدید دھچکا لگا ہے اور کئی ممالک میں پانی کی فراہمی کے حوالے سے ہنگامی اقدامات پر غور کیا جا رہا ہے۔ ماہرین کا کہنا ہے کہ کم بارشوں اور تپش میں اضافے کا یہ امتزاج جنگلات کی آگ اور دیگر ماحولیاتی خطرات کو بھی بڑھا رہا ہے۔ کئی یورپی ممالک کے حکام نے اس صورتحال پر گہری تشویش کا اظہار کرتے ہوئے فوری نوعیت کے اقدامات اٹھانے کی اپیل کی ہے۔ ماحولیاتی ماہرین کا ماننا ہے کہ اگر عالمی سطح پر کاربن کے اخراج میں کمی کے لیے موثر اقدامات نہ کیے گئے، تو آنے والے برسوں میں اس قسم کے شدید موسمی حالات معمول بن جائیں گے۔ اس تمام صورتحال میں عوام کو بھی احتیاطی تدابیر اختیار کرنے کی ہدایت کی گئی ہے تاکہ شدید گرمی کے منفی اثرات سے بچا جا سکے۔