لندن کے گرین وچ پارک میں ڈسٹ ڈیول کا نظارہ

برطانیہ کے دارالحکومت لندن کے ایک معروف تفریحی مقام گرین وچ پارک میں اتوار کے روز ایک غیر معمولی اور حیرت انگیز موسمیاتی واقعہ پیش آیا، جہاں ایک چھوٹا سا گرداب یا جسے سائنسی زبان میں 'ڈسٹ ڈیول' کہا جاتا ہے، اچانک نمودار ہوا۔ اس سنسنی خیز مناظر نے وہاں موجود چہل قدمی کرنے والے شہریوں اور سیاحوں کو شش و پنج میں مبتلا کر دیا۔ اتوار کے روز جب پارک میں عام دنوں کی طرح رونق لگی ہوئی تھی اور لوگ خوشگوار موسم سے لطف اندوز ہو رہے تھے، اچانک ہوا کا ایک تیز دائرہ بنا جس نے مٹی اور پتوں کو ہوا میں بلند کرنا شروع کر دیا۔موقع پر موجود متعدد افراد نے اس نایاب اور دلچسپ منظر کو اپنے موبائل کیمروں میں محفوظ کر لیا۔ سوشل میڈیا پر وائرل ہونے والی ویڈیوز میں دیکھا جا سکتا ہے کہ کس طرح یہ چھوٹا سا طوفانی بگولہ نما گرداب پارک کے کھلے میدان میں گھومتا رہا اور لوگوں کے قریب سے گزرتا گیا۔ خوش قسمتی سے اس واقعے میں کسی قسم کے جانی یا مالی نقصان کی کوئی اطلاع موصول نہیں ہوئی، کیونکہ یہ گرداب انتہائی محدود رقبے اور کمزور شدت کا حامل تھا۔محکمہ موسمیات اور ماہرین کے مطابق، 'ڈسٹ ڈیول' عام طور پر اس وقت بنتے ہیں جب زمین سورج کی روشنی سے شدید گرم ہو جاتی ہے اور اس کے اوپر موجود ہوا اچانک اوپر اٹھتی ہے، جس سے ہوا کا ایک گھومتا ہوا ستون بن جاتا ہے۔ یہ بڑے طوفانوں یا ٹورنیڈو سے بالکل مختلف اور نسبتاً بے ضرر ہوتے ہیں جو عام طور پر خشک اور گرم موسم میں کھلے میدانوں میں دیکھے جاتے ہیں۔ لندن کے پارک میں اس طرح کا نظارہ ہونا ایک غیر معمولی بات ہے، جس نے نہ صرف موقع پر موجود افراد کی توجہ حاصل کی بلکہ عالمی سطح پر بھی سوشل میڈیا صارفین کی توجہ کا مرکز بن گیا۔