کولمبیا میں طاقتور زلزلہ، کم از کم 20 جاں بحق اور متعدد زخمی

کولمبیا اور اس کے پڑوسی لاطینی امریکی ممالک میں پیر کے روز ایک طاقتور زلزلے نے تباہی مچا دی، جس کے نتیجے میں کم از کم 20 افراد جاں بحق ہو گئے ہیں۔ زلزلے کے بعد مختلف شہروں میں عمارتیں منہدم یا شدید متاثر ہوئی ہیں، اور طبی عملہ فوری طور پر متاثرہ افراد کی مدد کے لیے موقع پر پہنچ گیا۔ کولمبیا کے ارضیاتی سروے اور امریکی ادارے یو ایس جی ایس کے مطابق زلزلے کی شدت 7.4 ریکارڈ کی گئی، جس کا مرکز ملک کے مغرب میں زمین کی گہرائی میں واقع تھا۔ پیرئرا شہر کے میئر موریسیو سالازار نے میڈیا کو بتایا کہ اکیلے اس قصبے میں 18 افراد ہلاک ہوئے ہیں جبکہ کئی افراد منہدم عمارتوں کے ملبے تلے دبے ہوئے ہیں۔ انہوں نے صورتحال کو انتہائی تشویشناک قرار دیا۔ اس کے علاوہ مانیزالیس شہر میں بھی دو افراد کے جاں بحق ہونے کی تصدیق کی گئی ہے۔ حکام نے واضح کیا ہے کہ زلزلے کے بعد سونامی کا کوئی خطرہ نہیں ہے، تاہم یہ زلزلہ ایکواڈور، پانامہ اور وینزویلا تک محسوس کیا گیا۔ دارالحکومت بوگوٹا میں بھی عمارتیں خالی کرا لی گئیں جہاں لوگ خوفزدہ ہو کر سڑکوں پر نکل آئے۔ کولمبیا کے چوک صوبے کے گورنر نے سوشل میڈیا پر بتایا کہ صوبائی دارالحکومت کیوبڈو میں عمارتوں کو شدید نقصان پہنچا ہے اور متعدد افراد زخمی ہیں۔ ٹی وی فوٹیجز میں دیکھا گیا کہ سیاحتی علاقے کافی ریجن میں بھی کئی عمارتیں ملبے کا ڈھیر بن چکی ہیں۔ متاثرہ علاقوں میں بجلی اور موبائل فون کا نظام معطل ہو گیا ہے، جس کی وجہ سے امدادی کارروائیوں میں مشکلات پیش آ رہی ہیں۔ کالی شہر کے میئر نے بھی بڑے پیمانے پر نقصان کی تصدیق کی ہے جہاں کم از کم 20 عمارتیں منہدم ہوئی ہیں اور لوگوں کے پھنسے ہونے کی اطلاعات ہیں۔ شہر نے بوگوٹا اور میڈیئن سے امدادی ٹیمیں طلب کر لی ہیں۔ سول ایوی ایشن ایجنسی کے مطابق مغرب میں واقع چھ چھوٹے ہوائی اڈوں پر فضائی آپریشن معطل کر دیا گیا ہے۔ حکام صورتحال کا جائزہ لے رہے ہیں اور متاثرہ علاقوں میں ہنگامی امداد فراہم کرنے کے لیے اقدامات کیے جا رہے ہیں۔